Koha e parashikuar e leximit: 2 minuta
10 tetor 2025
Politikanja opozitare nga Venezuela, María Corina Machado, është shpallur fituese e Çmimit Nobel për Paqen për vitin 2025.
Machado, e njohur si një nga figurat më të guximshme të opozitës demokratike në Amerikën Latine, është vlerësuar nga Komiteti Nobel për përkushtimin e saj ndaj paqes dhe demokracisë në një vend të zhytur prej vitesh në krizë politike dhe shtypje.
“Viti 2025 i shkon një kampioneje të guximshme dhe të përkushtuar të paqes, një gruaje që e mban flakën e demokracisë të ndezur mes një errësire në rritje”, tha Komiteti për fitoren e Machados.
Në deklaratën e tyre, ata shtuan:
“Si udhëheqëse e Forcave Demokratike në Venezuelë, María Corina Machado është një nga shembujt më të jashtëzakonshëm të guximit civil në Amerikën Latine. Kohët e fundit, Machado ka qenë një figurë kyçe bashkuese në një opozitë politike që dikur ishte thellësisht e përçarë, një opozitë që gjeti terren të përbashkët në kërkesën për zgjedhje të lira dhe qeveri përfaqësuese.”
Machado është ndaluar nga autoritetet e regjimit të Nicolás Maduro për të kandiduar në zgjedhjet presidenciale, por mbetet simbol i qëndresës për mijëra qytetarë venezuelianë.
Në listën e përfolur për këtë çmim ishte edhe emri i Donald Trump, presidenti i 45-të i Shteteve të Bashkuara, por Komiteti vendosi t’ia japë çmimin lideres venezueliane për përkushtimin e saj ndaj paqes dhe demokracisë.
