Koha e parashikuar e leximit: 2 minuta
24 dhjetor 2025
Aktivistja suedeze Greta Thunberg u lirua të mërkurën, më 24 dhjetor, pas arrestimit një ditë më parë në Londër, gjatë një proteste në mbështetje të Palestinës. 22-vjeçarja u ndalua nga policia britanike me akuzën për mbështetje të një organizate të shpallur terroriste, pasi mbante një pankartë në favor të të burgosurve të grupit “Palestinian Action”.
Sipas policisë, arrestimi u krye në bazë të Ligjit kundër Terrorizmit, pasi pankarta lidhej me një organizatë të ndaluar ligjërisht në Mbretërinë e Bashkuar. Thunberg u lirua me kusht, ndërsa çështja pritet të shqyrtohet nga autoritetet në fillim të marsit 2026.
Organizata “Prisoners for Palestine”, e cila mbështet aktivistë palestinezë të arrestuar, deklaroi se protesta kishte si qëllim ndërtesën e një kompanie sigurimesh që ofron shërbime për Elbit Systems, kompani izraelite e industrisë ushtarake. Dy persona të tjerë u arrestuan për hedhje bojë të kuqe, ndërsa Thunberg u ndalua vetëm për pankartën që mbante.
Ky arrestim është pjesë e një serie veprimesh ku Greta Thunberg shfaqet si një zë i fortë për drejtësinë sociale dhe të drejtat e njeriut, duke përfshirë edhe ngjarje të ngjashme në Mbretërinë e Bashkuar gjatë vitit 2023.
