Koha e parashikuar e leximit: 2 minuta
13 janar 2026
Presidenti amerikan Donald Trump ndodhet përballë një momenti vendimtar lidhur me zhvillimet në Iran, pas përshkallëzimit të dhunës ndaj protestuesve. Dhjetë ditë më parë, Trump deklaroi se Shtetet e Bashkuara ishin të gatshme të ndërhynin në mbrojtje të protestuesve iranianë, nëse regjimi do të përdorte forcë kundër tyre.
Në atë kohë, presidenti theksoi se SHBA-të ishin “të pajisura, të gatshme dhe të përgatitura për të nisur operacione”, deklaratë që u bë përpara se shtypja e dhunshme në Iran të shfaqej në përmasa të plota. Tani, pas raportimeve për represion të ashpër dhe viktima të shumta, vëmendja ndërkombëtare është përqendruar te hapat që pritet të ndërmarrë Uashingtoni.
Sekretarja e Shtypit e Shtëpisë së Bardhë, Karoline Leavitt, deklaroi se vendimi mbetet ekskluzivisht në dorën e presidentit.
“Askush nuk e di se çfarë do të bëjë Presidenti Trump, përveç vetë Presidentit Trump. Bota mund të vazhdojë të presë dhe të hamendësojë”, u shpreh ajo.
Sipas burimeve zyrtare, presidenti do të informohet të martën nga zyrtarët e lartë për skenarët e mundshëm të veprimit. Duke folur për gazetarët në bordin e Air Force One, Trump tha se po shqyrtonte “disa mundësi shumë të forta”.
Siç kanë treguar edhe zhvillimet e mëparshme, SHBA-të disponojnë kapacitete të avancuara për sulme nga distanca. Verën e kaluar, bombarduesit strategjikë B-2 kryen misione 30-orëshe nga baza ajrore Whiteman në Misuri, duke goditur objektiva bërthamore iraniane me bomba shkatërruese për bunkerë.
Zyrtarë të Pentagonit, të cituar nga CBS News, bëjnë të ditur se përgjigjja amerikane mund të përfshijë jo vetëm goditje ushtarake, por edhe operacione kibernetike dhe fushata të fshehta psikologjike, me synim dobësimin e strukturave komanduese dhe të sigurisë së regjimit iranian.
Megjithatë, burime amerikane përjashtojnë një skenar që do t’i ngjante ndërhyrjes së drejtpërdrejtë ushtarake të tipit të ngjarjeve të Karakasit më 3 janar, duke lënë të hapur një gamë më të gjerë veprimesh të kontrolluara dhe të targetuara.
