Koha e parashikuar e leximit: 2 minuta
15 janar 2026
Suficiti tregtar i Kinës arriti një nivel rekord prej afro 1.2 trilionë dollarësh në vitin 2025, njoftoi qeveria kineze, ndërsa rritja e eksporteve drejt tregjeve të tjera kompensoi ndjeshëm rënien e dërgesave në Shtetet e Bashkuara për shkak të tarifave më të larta të vendosura nga administrata e presidentit Donald Trump.
Sipas të dhënave doganore, eksportet kineze u rritën me 5.5%, duke arritur në 3.77 trilionë dollarë, ndërsa importet mbetën pothuajse të pandryshuara në 2.58 trilionë dollarë. Për krahasim, suficiti tregtar i vitit 2024 kishte qenë rreth 992 miliardë dollarë.
Në muajin dhjetor, eksportet shënuan një rritje vjetore prej 6.6%, duke tejkaluar pritshmëritë e ekonomistëve, ndërsa importet u rritën me 5.7%. Kina kaloi për herë të parë pragun e 1 trilion dollarëve suficit tregtar që në muajin nëntor, gjatë 11 muajve të parë të vitit.
Ndërsa eksportet drejt SHBA-së ranë me 20% gjatë vitit 2025, dërgesat në rajone të tjera shënuan rritje të ndjeshme. Eksportet në Afrikë u rritën me 26%, në Azine Juglindore me 13%, në Bashkimin Evropian me 8%, dhe në Amerikën Latine me 7%.
Analistët theksojnë se kërkesa globale për çipa kompjuterikë, pajisje teknologjike dhe materiale industriale ka qenë një nga faktorët kryesorë që mbështeti eksportet. Po ashtu, eksportet e automjeteve u rritën me 21%, duke kaluar 7 milionë njësi, të nxitura kryesisht nga automjetet elektrike dhe hibride.
Megjithatë, autoritetet kineze paralajmërojnë se Kina përballet me një mjedis tregtar gjithnjë e më kompleks dhe sfidues në vitin 2026. Ekspertët vlerësojnë se, edhe pse eksportet do të mbeten një shtyllë e rëndësishme e rritjes ekonomike, Kina do të duhet të mbështetet më shumë te kërkesa e brendshme, e cila vazhdon të mbetet e dobët për shkak të krizës së zgjatur në sektorin e pasurive të paluajtshme dhe besimit të ulët të konsumatorëve.
Ekonomistët parashikojnë që rritja e eksporteve të Kinës në vitin 2026 të ngadalësohet në rreth 3%, por suficiti tregtar pritet të mbetet mbi 1 trilion dollarë.
