Koha e parashikuar e leximit: 2 minuta
05 shkurt 2026
Imazhe dhe video të pa redaktuara të viktimave të abuzimit nga Jeffrey Epstein kanë qëndruar online për ditë të tëra, pavarësisht paralajmërimeve të zyrtarëve amerikanë për gabimet në redaktim. Avokatët e viktimave thonë se këto dështime i kanë shkaktuar viktimave dëme “të pariparueshme”.
Dosjet e Epstein përmbajnë informacione identifikuese për dhjetëra viktima, përfshirë emra, fotografi dhe materiale mjekësore. Sipas BBC Verify, disa imazhe tregonin femra të reja të veshura pjesërisht, me fytyrat dhe trupat e tyre të pakredaktuar, ndërsa disa dokumente përmbanin dy versione të së njëjtës fotografi – njëra e mbuluar dhe tjetra e paprekur.
Një video e publikuar identifikoi gjithashtu një person duke treguar pjesë të trupit të saj përpara kamerës. Avokatët e viktimave kritikuan ashpër Departamentin e Drejtësisë (DoJ) për dështimin në mbrojtjen e identitetit të viktimave.
Brad Edwards, një avokat që përfaqëson viktimat, deklaroi: “Dëmi i shkaktuar është i pariparueshëm.” Ashley Rubright, një e mbijetuar, tha: “Jam zemërthyer për vajzat, informacioni i të cilave u publikua. Ky është një shkelje kaq e madhe e një prej momenteve më të tmerrshme të jetës së tyre.”
Pas kërkesës së viktimave, një gjykatës i Nju Jorkut urdhëroi DoJ të mbyllë faqen e internetit derisa dokumentet të redaktoheshin siç duhet. Departamenti ka hoqur mijëra dokumente, duke deklaruar se ngarkimi i tyre ishte për shkak të një “gabimi teknik ose njerëzor”, dhe po vazhdon shqyrtimin e të dhënave të tjera për redaktim. Megjithatë, raportohet se disa imazhe të personave të identifikueshëm mbeten online edhe pas ndërhyrjes së DoJ, transmeton BBC.
Ky incident nxjerr në pah nevojën urgjente për mbrojtjen e viktimave dhe për kontroll më rigoroz mbi publikimin e dokumenteve të ndjeshme ligjore.
