Koha e parashikuar e leximit: 3 minuta
16 janar 2026
Qindra miliona dollarë të siguruara nga shitja e naftës venezueliane nga Shtetet e Bashkuara po depozitohen në Katar, një lëvizje e pazakontë që synon të përshpejtojë transferimin e fondeve drejt Venezuelës, por që njëkohësisht ka ngritur shqetësime për mungesë transparence.
Administrata Trump konfirmoi të mërkurën se ka realizuar shitjen e parë të naftës venezueliane, nga e cila janë arkëtuar rreth 500 milionë dollarë. Kjo pritet të jetë vetëm fillimi i një serie shitjesh që mund të sjellin miliarda dollarë të ardhura në muajt dhe vitet në vijim.
Në vend që fondet të mbaheshin në banka amerikane apo të transferoheshin drejtpërdrejt në Venezuelë, ato janë dërguar në banka në Katar, sipas burimeve të njohura me procesin. Sekretari amerikan i Thesarit, Scott Bessent, deklaroi se paratë do të fillojnë të qarkullojnë në Venezuelë, ndërsa burime nga sistemi financiar venezuelian raportojnë se bankat vendase tashmë kanë nisur të reklamojnë disponueshmërinë e parave të gatshme.
Venezuela ka qenë për vite me radhë nën sanksione të ashpra perëndimore, duke u shkëputur pothuajse plotësisht nga sistemi bankar ndërkombëtar. Në të njëjtën kohë, asetet e saj të naftës janë objekt i pretendimeve ligjore nga kompani të huaja energjetike që kërkojnë kompensim.
Presidenti Donald Trump ka akuzuar më herët Venezuelën për konfiskimin e aseteve amerikane të naftës, por ka theksuar se të ardhurat nga shitjet aktuale duhet të përfitojnë drejtpërdrejt popullin venezuelian dhe të mos bien në duart e kreditorëve ndërkombëtarë. Për këtë arsye, ai nënshkroi një urdhër ekzekutiv që ndalon çdo përpjekje ligjore për bllokimin apo sekuestrimin e këtyre fondeve.
Sipas ekspertëve, depozitimi i parave në Katar shërben si një mekanizëm mbrojtës ndaj padive dhe pretendimeve të kreditorëve perëndimorë. Katari ka luajtur edhe më parë rolin e ndërmjetësit mes SHBA-së dhe Venezuelës, ashtu siç ka bërë në raste të ngjashme me Iranin gjatë administratës Biden.
Sipas konsulentit ekonomik Alejandro Grisanti, bankat e Katarit janë udhëzuar që fondet t’i shpërndajnë gradualisht bankave venezueliane, me përparësi për ushqimin, ilaçet dhe bizneset e vogla. Fondet do të administrohen nga Banka Qendrore e Venezuelës, por shpërndarja do të bëhet sipas kritereve të përcaktuara nga Shtetet e Bashkuara.
Megjithatë, kjo skemë ka ngjallur shqetësime serioze për transparencën dhe kontrollin e fondeve. Ekspertë të politikës së jashtme paralajmërojnë se, pa një plan publik dhe mekanizma të qartë kundër korrupsionit dhe pastrimit të parave, ky sistem rrezikon të shndërrohet në një “fond të errët”.
Kritikët druajnë gjithashtu se fondet që rikthehen në Venezuelë mund të përdoren nga qeveria e Nicolás Maduro-s për të mbështetur struktura të korruptuara, përfshirë grupe paraushtarake dhe rrjete kriminale, në vend që të shkojnë realisht për nevojat e qytetarëve.
Nga ana tjetër, disa ligjvënës amerikanë kanë vënë në dyshim ligjshmërinë e këtij mekanizmi. Senatorja demokrate Elizabeth Warren e ka cilësuar transferimin e fondeve në Katar si një veprim pa bazë ligjore dhe potencialisht problematik, duke kërkuar më shumë transparencë dhe llogaridhënie.
