Koha e parashikuar e leximit: 3 minuta
24 nentor 2025
Kancelari gjerman Friedrich Merz i është bashkuar thirrjeve të bllokut kristiandemokrat (CDU/CSU) për të frenuar rritjen e numrit të të rinjve ukrainas që hyjnë në Gjermani. Merz ka deklaruar se gjatë një telefonate javën e kaluar me Presidentin ukrainas Volodymyr Zelenski, i ka kërkuar që të sigurohet që të rinjtë ukrainas të mos largohen masivisht drejt Gjermanisë, duke theksuar se “ata janë të nevojshëm në atdhe”.
Kryeministri bavarez Markus Söder ishte i pari që ngriti publikisht shqetësimin, duke kërkuar që BE-ja dhe Berlini të ushtrojnë presion mbi Kievin për të kontrolluar flukset e të rinjve. Qëndrime të ngjashme ka mbështetur edhe CDU-ja, ndërsa partneri në koalicion, SPD, shfaq hezitim për të mbështetur këtë linjë. Deputeti socialdemokrat Ralf Stegner deklaroi për DW se është e vështirë t’u kërkohet të rinjve ukrainas të shërbejnë në ushtri, duke nënvizuar se fokusi duhet të mbetet te përpjekjet për t’i dhënë fund luftës.
Vendimi i Kievit për të lejuar largimin e të rinjve 18–22 vjeç në fund të gushtit ka ndikuar në rritjen e mbërritjeve në Gjermani, nga vetëm 19 persona në javë gjatë gushtit, në 1.800 në fund të tetorit. Aktualisht mbi 1.2 milion ukrainas jetojnë në Gjermani.
Sipas ekspertit të DGAP, Stefan Meister, shqetësimet e Merz lidhen si me nevojën e Ukrainës për burime njerëzore, ashtu edhe me synimin e qeverisë gjermane për të frenuar migracionin. Ai thekson se presioni politik rritet edhe nga rritja e ndikimit të AfD-së, ndërsa CDU/CSU shfaq tendencë për të ashpërsuar retorikën.
Në këtë kontekst, qeveria federale ka propozuar reformimin e skemës së ndihmave sociale “Bürgergeld”, duke planifikuar që refugjatët ukrainas që mbërrijnë pas 1 prillit 2025 të marrin përfitime të barasvlershme me azilkërkuesit — rreth 440 euro në muaj, afro 120 euro më pak se aktualisht, me mbulim më të kufizuar shëndetësor.
Ndërsa disa analistë e mbështesin qëndrimin e Merz, si publicisti Winfried Schneider-Deters, të tjerë e kundërshtojnë. Irina Shulikina, drejtuese e OJQ-së ukrainase “Viche” në Berlin, thekson se Ukraina ka po aq nevojë për armë sa ka për njerëz, ndërsa kritikon presionin ndaj të rinjve 18–22 vjeç që ende konsiderohen të varur nga prindërit dhe të traumatizuar nga vite lufte.
Debati hap pikëpyetje edhe për gatishmërinë e ukrainasve për t’u kthyer pas luftës. Studimet e fundit tregojnë se shumica e tyre synojnë të qëndrojnë në Evropë, veçanërisht në Gjermani. Sipas një studimi të BAMF, 59% e ukrainasve që mbërritën në fillim të luftës dhe 69% e atyre që erdhën më vonë nuk planifikojnë kthimin. Megjithatë, vlerësimet tregojnë se rreth 300.000 deri në 400.000 prej tyre janë larguar nga Gjermania ose janë zhvendosur në vende të tjera që nga viti 2022.
Ndërkohë, Zelenski nuk ka dhënë ende një reagim për kërkesën e Merz, ndërsa ekspertët dyshojnë se Kievi do të pranojë kufizime që mund të shkaktojnë pakënaqësi të brendshme.
