Koha e parashikuar e leximit: 2 minuta
17 tetor 2025
Gjykata e Shkodrës ka vendosur sot masën e sigurisë “arrest me burg pa afat” për Gjovalin Shkambin, i cili publikisht kërcënoi gjyqtarët, duke u shprehur se “ai që do ta dënojë nipin tim, nuk del i gjallë”. Vendimi u mor pas seancës gjyqësore ku prokuroria argumentoi se kërcënimet e tij paraqesin një kërcënim serioz për sistemin e drejtësisë dhe rendin kushtetues.
Gjovalin Shkambi është i njohur si xhaxhai i Elvis Shkambit, i akuzuar për vrasjen e gjyqtarit Astrit Kalaja, të ndodhur më 6 tetor 2025 në sallën e Gjykatës së Apelit.
Pas arrestimit të nipit të tij, Gjovalin Shkambi u shpreh publikisht me deklarata kërcënuese ndaj gjyqtarëve, ndër të tjera:
• “Ai gjyqtar që do ta dënojë nipin tim, do të ketë fatin e Astrit Kalasë”
• “Do t’i hanë plumbat sikur i hëngri Astrit Kalaja”
• “Gjykatari që do të dënojë do të përballet me plumba”
Këto deklarata janë cilësuar nga prokuroria si kërcënim i drejtpërdrejtë ndaj sistemit të drejtësisë dhe si element që mund të ndikojë në sigurimin e rendit dhe stabilitetit institucional.
Sot në Gjykatën e Shkodrës u zhvillua seanca ku prokuroria parashtroi kërkesën për masë sigurie ndaj Shkambit, duke theksuar peshën dhe seriozitetin e kërcënimeve që ai kishte bërë.
Trupa gjykuese pranoi kërkesën e prokurorisë dhe caktoi masën “arrest me burg pa afat” për Shkambin.
Në vendim është marrë shkas edhe nga rreziku i përsëritjes së veprës dhe mundësia e ndikimit negativ në hetimet në vijim.
