Koha e parashikuar e leximit: 2 minuta
19 janar 2026
Kryetari i Partisë Demokratike, Sali Berisha, ka reaguar pas zbulimit të një call-centeri që dyshohet se mashtronte qytetarë të huaj, duke vjedhur miliona euro përmes skemave të rreme financiare.
Në një deklaratë për mediat, nga jashtë ambienteve të SPAK, Berisha pretendoi se kjo veprimtari kriminale zhvillohej nën mbikëqyrjen e strukturave shtetërore, të cilat ai i cilësoi si “narko-polici”.
Sipas tij, pronar i biznesit është Amant Josifi, ndërsa Berisha përmendi edhe emrin e Olsi Ramës, duke pretenduar se ata janë të përfshirë në këtë skemë mashtrimi. Ai deklaroi se call-centeri i kontrolluar vidhte të paktën 30 milionë euro në muaj, përmes mashtrimit të qytetarëve të huaj.
Berisha e krahasoi këtë skemë me atë të kultivimit të kanabisit në të shkuarën, duke pretenduar se për çdo kompjuter paguhej një tarifë për t’u mbyllur sytë nga autoritetet. Sipas tij, qytetarëve u premtoheshin fitime të rreme në bursa apo rikuperim i humbjeve financiare, në një proces që ai e quajti “mashtrim masiv”.
Ai shtoi se gazetarët investigativë të emisionit “Le Iene” kishin ndjekur këtë çështje për rreth dy vite dhe dispononin materiale filmike, fotografi dhe dokumente. Megjithatë, sipas Berishës, në momentin kur autoritetet shkuan për kontroll, ambientet u gjetën bosh dhe pajisjet ishin larguar.
Në përfundim, Berisha e cilësoi rastin si provë të një “veprimtarie kriminale të gjeneralizuar”, duke akuzuar shtetin për bashkëpunim dhe mbulim të kësaj skeme.
