Koha e parashikuar e leximit: 3 minuta
22 dhjetor 2025
Rusia e sheh veçanërisht Starlink-un e Elon Musk si një kërcënim serioz, tregojnë gjetjet. Mijëra satelitë në orbitë të ulët kanë qenë thelbësorë për mbijetesën e Ukrainës kundër një pushtimi në shkallë të plotë rus, i cili tani është në vitin e katërt.
Raporte inteligjence nga dy vende të NATO-s sugjerojnë se Rusia po punon për zhvillimin e një arme të re anti-satelitore, e cila do të synonte veçanërisht rrjetin Starlink të Elon Musk.
Sipas Associated Press, vlerësimet tregojnë se kjo armë mund të përdoret për të mbushur orbitat e ulëta me qindra mijëra predha me dendësi të lartë, duke çaktivizuar një numër të madh satelitësh njëkohësisht.
Burimet e inteligjencës paralajmërojnë se një sulm i tillë nuk do të prekë vetëm Starlink-un, por do të krijonte edhe rrezik serioz për satelitë të tjerë, duke shkaktuar dëme kolaterale të mëdha dhe potencialisht kaos në hapësirë.
Qëllimi i supozuar i këtij zhvillimi është të dobësojë dominimin hapësinor të Perëndimit, i cili ka qenë vendimtar në mbështetjen e Ukrainës gjatë luftës. Starlink ka luajtur një rol kyç në komunikimet ushtarake ukrainase, përfshirë koordinimin në fushën e betejës dhe shënjestrimin e armëve, si dhe në ruajtjen e lidhjeve për civilët dhe institucionet shtetërore në zonat e goditura nga sulmet ruse.
Sipas gjetjeve, Rusia e konsideron rrjetin Starlink një kërcënim strategjik dhe ka paralajmëruar më herët se satelitët komercialë që mbështesin ushtrinë ukrainase mund të trajtohen si objektiva legjitime. Këtë muaj, Moska njoftoi zhvillimin e sistemit raketor tokësor S-500, i cili thuhet se është i aftë të godasë objektiva në orbitë të ulët.
Ndryshe nga testi i vitit 2021, kur Rusia shkatërroi një satelit të vjetër nga epoka e Luftës së Ftohtë, arma e re do të synonte njëkohësisht disa satelitë Starlink, potencialisht përmes formacioneve të satelitëve të vegjël ende të palëshuar, thuhet në raport.
Megjithatë, analistë të pavarur shprehin dyshime për realizueshmërinë e një arme të tillë, duke paralajmëruar se përdorimi i saj mund të dëmtojë edhe sistemet hapësinore të vetë Rusisë dhe të aleatëve të saj, përfshirë Kinën, të cilët mbështeten gjithashtu në mijëra satelitë për komunikim, mbrojtje dhe funksione të tjera kritike. Sipas tyre, këto rreziqe mund ta frenojnë Moskën nga zhvillimi ose përdorimi praktik i kësaj arme.
