Studimi evropian zbulon mbetje të shumta pesticidesh në mollë: 85% e mostrave të testuara të kontaminuara
Koha e parashikuar e leximit: 2 minuta
29 janar 2026
Një analizë e kryer nga koalicioni mjedisor Pan Europe ka zbuluar se 85% e mollëve të testuara në 13 vende evropiane përmbajnë mbetje të pesticideve, duke përfshirë disa mostra me gjurmë deri në shtatë kimikate të ndryshme. Mostrat u morën nga vende si Franca, Spanja, Italia dhe Polonia, dhe përfshinin rreth 60 mollë të blera nga tregu.
Sipas Pan Europe, 71% e mostrave përmbanin pesticide të klasifikuara si ndër më të rrezikshmet në BE, të njohura si “kandidat për zëvendësim”, të cilat blloku evropian synon t’i eliminojë gradualisht. Gjithashtu, 64% e mollëve përmbanin substanca të përhershme kimike Pfas, të pranishme në mjedis dhe produkte të përditshme.
Koalicioni paralajmëroi për efektin e “koktej” të pesticideve, kur konsumatori ekspozohet njëkohësisht ndaj disa kimikateve, dhe kritikoi Autoritetin Evropian të Sigurisë Ushqimore për vlerësimin individual të pesticideve, duke mos marrë parasysh rrezikun nga ekspozimi i shumëfishtë.
Në rast se këto mollë do të përpunoheshin si ushqim për fëmijë, 93% e mostrave do të ndaloheshin, për shkak të niveleve të larta të pesticideve që tejkalojnë kufijtë e rreptë të BE-së për ushqimin e fëmijëve nën tre vjeç.
Pan Europe këshillon konsumatorët të zgjedhin mollë organike ose të pastrojnë mirë mollët konvencionale para konsumit për të reduktuar rrezikun nga mbetjet e pesticideve.
ndryshe, mollët renditen ndër frutat e preferuara të evropianëve dhe janë më të kultivuara në BE, veçanërisht në Poloni, Itali dhe Francë. Ato janë gjithashtu ndër frutat që trajtohen më shumë, me pesticide që përdoren në veçanti për të luftuar koren e mollës, kërcënimin kryesor kërpudhor për pemishtet. Më shumë se gjysma e trajtimeve të shumta vjetore të kryera mbi frutat – rreth 35 mesatarisht – synojnë sëmundjen.
