Koha e parashikuar e leximit: 2 minuta
26 janar 2026
Marrëdhëniet tregtare mes Bashkimit Europian dhe Shteteve të Bashkuara mbeten të forta, por gjithashtu të ndikuara nga pasiguria, sidomos pas politikanëve të reja tarifore të administratës Trump. BE-ja është partneri më i madh tregtar i SHBA-së dhe së bashku përfaqësojnë mbi 40% të prodhimit ekonomik global, duke mbuluar gati një të tretën e tregtisë botërore.
Në vitin 2024, shkëmbimet tregtare të mallrave arritën 975 miliardë dollarë, ndërsa duke përfshirë edhe shërbimet, vëllimi total arriti rreth 1.68 trilionë euro. SHBA-ja ka një deficit të madh tregtar me BE-në në mallra, i cili u rrit në 197 miliardë euro, ndërsa Europa ka suficite të mëdha në sektorë si automobilët dhe farmaceutika. SHBA-ja ka suficit vetëm në energji, duke përfshirë naftën, gazin dhe qymyrin.
Marrëdhënia balancohet pjesërisht nga tregtia e shërbimeve, ku SHBA-ja regjistron një suficit prej rreth 148 miliardë eurosh, falë gjigantëve të teknologjisë dhe shërbimeve digjitale. Sipas DË, kur merren parasysh si mallrat, ashtu edhe shërbimet, deficiti amerikan zvogëlohet në rreth 50 miliardë euro, duke treguar se marrëdhënia tregtare është më e ekuilibruar sesa duket shpesh.
Pas luftës në Ukrainë, BE-ja është bërë blerësi kryesor i gazit natyror të lëngshëm amerikan (LNG), duke krijuar një varësi të ndërsjellë: ndërprerjet do të dëmtonin si Europën ashtu edhe prodhuesit amerikanë. Në bujqësi, SHBA-ja varet nga tregu evropian për produkte si soja, ndërsa kontinenti i vjetër ka alternativa të tjera importi, për shembull nga Brazili.
Politikat tarifore kanë ndikuar gjithashtu në dobësimin e dollarit, duke favorizuar eksportet amerikane, por duke rritur inflacionin për shkak të importeve më të shtrenjta.
Në tërësi, marrëdhëniet tregtare BE–SHBA mbeten thellësisht të ndërvarura, me përfitime dhe rreziqe për të dyja palët, ku çdo tension tarifor mund të ketë pasoja të ndërsjella për ekonomitë e mëdha globale.
