Koha e parashikuar e leximit: 2 minuta
28 janar 2026
Një ngjarje e rëndë ka tronditur qytetin e Lipjanit, ku një i mitur, i raportuar i zhdukur një ditë më parë, ka humbur jetën. Rasti është konfirmuar nga Policia e Kosovës, e cila ka bërë të ditur se vdekja e tij është konstatuar në Qendrën Klinike Universitare të Kosovës (QKUK).
Sipas njoftimit zyrtar, familjarët kishin raportuar fillimisht se i mituri nuk ishte kthyer në shtëpi, çka bëri që të nisnin kërkimet për gjetjen e tij. Gjatë këtyre kërkimeve, ai u gjet nga një dëshmitar në një lum në zonën e Lipjanit.
I mituri u dërgua menjëherë me autoambulancë drejt QKUK-së në Prishtinë, por mjekët konstatuan se ai kishte ndërruar jetë. Në vendin e ngjarjes kanë dalë njësitë përkatëse policore për të kryer procedurat hetimore.
Me vendim të prokurorit kompetent, trupi i pajetë është dërguar në Institutin e Mjekësisë Ligjore për obduksion, me qëllim sqarimin e plotë të rrethanave të vdekjes.
Policia e Kosovës ka bërë të ditur se hetimet për këtë rast kanë nisur dhe se do të ndërmerren të gjitha veprimet e nevojshme për zbardhjen e ngjarjes.
