Koha e parashikuar e leximit: 3 minuta
04 nentor 2025
Lëvizja Vetëvendosje ka propozuar Glauk Konjufcën si mandatar për kryeministër të Kosovës, në përpjekje për të formuar qeverinë pas dështimit të raundit të parë. Në fjalën e tij, Konjufca bëri thirrje për bashkëpunim mes pozitës dhe opozitës, duke theksuar se VV-ja ka bërë kompromisin e madh duke mos propozuar Albin Kurtin si kandidat.
Për Konjufcën, Kurti është kryeministri më i mirë që ka pasur ndonjëherë Kosova.
Duke e pranuar nominimin për mandatar, ai tha se partitë tash e kanë në dorë nëse duan ta votojnë Qeverinë apo duan zgjedhje të reja.
“Tash partitë tjera e kanë në dorë nëse duan zgjedhje menjëherë. Të gjithë jemi në llupën e popullit, por mua po më duket që shpata e gjykimit do të jetë më e mprehtë se kurrë më parë”- tha Konjufca, duke thënë se kompromis më të madh se ky Vetëvendosja nuk mund të bëj.
Ai tha se me përulje e obligim e pranon nominimin e Këshillit të Vetëvendosjes për kryeministër. Këtë tha se po e bën si “thirrje nga detyra” e cila i “shndërron në shërbëtor” të interesit publik.
“LVV-ja e ka definuar këtë interes në dy shtylla në rrethanat aktuale. Shmangia e dy palë zgjedhjeve të mundshme brenda tre muajsh dhe së dyti, votimin e buxhetit për vitin 2026, pa të cilin rrezikohen dimensionet vitale të qytetarëve tanë prej mbi 80 mijë pagave të sektorit publik, pensionet e shtesat e fëmijëve, deri te projektet ekzistenciale për shoqërinë tonë. Do të ishte e pafalshme nëse për shkak të tekave të partive politike e humbim mundësinë e përfitimit të benefiteve qindra milionëshe duke u krekosur se po shkojmë në zgjedhje. Edhe dy procese tjera nuk na presin, RTK-ja mbet pa pagat e tyre e po ashtu nuk ka kurrfarë afat shtesë për buxhetin e tri komunave”- ka thënë ai.
Konjufca i tha Kurtit se “aq sa e ka gëzuar popullin me mbështetjen e madhe”, në po të njëjtën masë ka nxitur shumë frikë te kundërshtarët politikë “që u bashkuan vetëm me një qëllim – të ta pamundësojnë krijimin e një qeverie për herë të tretë”.
Në këtë frymë ai ka shtuar: “Ama një gjë e dimë të gjithë: nuk ka forcë që e shkëputë apo e ndal lidhmërinë e popullit tanë me Lëvizjen Vetëvendosje”.
Lëvizja Vetëvendosje ka mandatuar Glauk Konjufcën për kryeministër.
Këtë e konfirmoi kryetari i LVV-së, Albin Kurti në mbledhjen e Këshillit të Përgjithshëm të kësaj partie.
“Unë si kryetar i Vetëvendosjes, propozojë që manadatin e dytë për krijimin e Qeverisë të ia japim nënkryetarit, aktivistit, mikut e shoku tonë të afërt, e fortë të besueshëm, Glauk Konjufca”- tha Kurti.
