Koha e parashikuar e leximit: 4 minuta
20 nentor 2025
Një delegacion i nivelit të lartë të Pentagonit ka mbërritur në Kiev për të “prekur nga afër realitetin e luftës” dhe për të diskutuar hapat drejt një formule të mundshme paqeje mes Ukrainës dhe Rusisë, njoftoi ushtria amerikane.
Ekipi, i kryesuar nga Sekretari i Ushtrisë Amerikane Dan Driscoll, zhvilloi takimin e parë me kryeministren ukrainase Yulia Svyrydenko të enjten në mëngjes, ndërsa më vonë pritet të takohet edhe me Presidentin Volodymyr Zelensky.
Vizita vjen vetëm një ditë pasi mediet amerikane dhe europiane publikuan raportime mbi një draft-propozim të ri të pa konfirmuar zyrtarisht nga SHBA apo Rusia, i cili parashikon lëshime të dhimbshme nga Ukraina — përfshirë dorëheqjen nga territoret e mbetura të Donbasit dhe një reduktim drastik të ushtrisë. Drafti i ashtuquajtur 28-pikësh mësohet të jetë hartuar nga i dërguari i Presidentit Donald Trump, Steve Witkoff, dhe përfaqësuesi i Kremlinit, Kirill Dmitriev.
Sekretari amerikan i Shtetit, Marco Rubio, duke mos e mohuar plotësisht ekzistencën e nismës, shkroi në X se një “paqë e qëndrueshme kërkon lëshime të vështira nga të dyja anët”, ndërsa shtoi se SHBA-të po konsultohen paralelisht me të dy palët për ide që “mund t’i japin fund luftës”.
Ekipi i Driscoll është delegacioni më i lartë ushtarak amerikan që viziton Kievin që prej marrjes së detyrës nga Presidenti Trump. Ai shoqërohet nga shefi i shtabit të ushtrisë, gjenerali Randy George, komandanti i forcave amerikane në Evropë, gjenerali Chris Donahue, dhe rreshteri major Michael Weimer.
Ndërkohë, në sfond qëndron drafti Witkoff–Dmitriev, i raportuar nga Axios, Financial Times dhe Reuters, pas takimeve të gjata të dy hartuesve në Miami. Sipas burimeve të tyre, dokumenti sugjeron t’i kërkohet Kievit heqja dorë nga zona të Donbasit, tkurrja e ushtrisë dhe dorëzimi i një pjese të kapaciteteve të armatimit. Presidenti Zelensky ka refuzuar çdo ide që implikon humbje territori.
Kremlini konfirmoi të enjten vetëm se kanë ekzistuar “kontakte”, por jo negociata. Ndërkohë, Brukseli dhe Kievi janë distancuar nga dokumenti, duke paralajmëruar se një plan pa pjesëmarrjen e tyre do të kishte “peshën e gabuar” në favor të Rusisë.
Shefja e diplomacisë së BE-së, Kaja Kallas, tha se “asnjë plan nuk funksionon pa evropianët dhe pa ukrainasit”, ndërsa ministri i Jashtëm francez Jean-Noël Barrot theksoi se “askush në Ukrainë nuk pranon kapitullim në asnjë formë”.
Pas takimit me delegacionin e Pentagonit, kryeministrja Svyrydenko tha se vizita u dha amerikanëve mundësinë “të shohin nga afër pasojat e agresionit rus”. Ndërsa ministri i Mbrojtjes Denys Shmyhal njoftoi se bisedimet u përqendruan te “hapat e ardhshëm për zbatimin e marrëveshjeve të sigurisë mes Presidentit Zelensky dhe Presidentit Trump”.
Vizita ndodhi në të njëjtën ditë kur Ukraina u godit nga një sulm i rëndë rus në Ternopil, ku u vranë të paktën 26 persona dhe dhjetëra rezultojnë të zhdukur. Zelensky ndodhej në Turqi gjatë sulmit, mes raportimeve se një takim i mundshëm me të dërguarin e Trump ishte planifikuar, por u anulua.
Ndërkohë, një zyrtar i Shtëpisë së Bardhë konfirmoi për BBC se i dërguari special për Ukrainën, Keith Kellogg, do të largohet nga posti në janar, duke e mbyllur mandatin e tij si një prej zërave më pro-Kievit në administratën amerikane.
Në skenë, lufta vazhdon — ndërsa diplomacia kërkon ende fjalën e magjisë që mund të mbyllë kapitullin më të përgjakshëm të Evropës që prej Luftës së Dytë Botërore.
