Koha e parashikuar e leximit: 2 minuta
18 shtator 2025
Disa parti dhe iniciativa qytetare në veri zotohen, gjithashtu, se do t’i rishikojnë ose shfuqizojnë vendimet e mëparshme të autoriteteve lokale dhe se çdo vendim i ri do të merret në konsultim me qytetarët.
Ndërsa Lista Serbe e nisi fushatën zgjedhore me një “numërim mbrapsht deri në rënien e kryetarëve të rremë të komunave” në veri të Kosovës, partitë e tjera politike serbe, që garojnë në zgjedhjet lokale të 12 tetorit në Kosovë, e akuzojnë këtë parti si përgjegjëse për gjendjen e vështirë të komunitetit serb.
Lista Serbe – partia më e madhe e serbëve në Kosovë dhe e vetmja në vend që ka mbështetjen e Beogradit zyrtar – premton se vendimet e autoriteteve aktuale lokale në komunat e veriut të Kosovës do të anulohen.
Në nëntor të vitit 2022, Lista Serbe inicioi tërheqjen e serbëve nga institucionet e Kosovës në veri dhe bëri thirrje për bojkotimin e zgjedhjeve lokale në prill të vitit 2023.
Kjo çoi në zgjedhjen e kryetarëve shqiptarë të komunave, të cilët mbetën në detyrë deri në fund të mandatit, sepse Lista Serbe, edhe në prill të vitit 2024, bëri thirrje për bojkotimin e votimit për shkarkimin e tyre.
Nga ana tjetër, partitë rivale të Listës Serbe kanë premtuar përmirësime konkrete në jetën e qytetarëve: ndërtim spitalesh, rikthim të transportit hekurudhor, përmirësim të infrastrukturës, si dhe ndarje nga “kriminaliteti politik”.
Analistët, megjithatë, janë kritikë ndaj fushatës. Boban Simiç nga Qendra për Afirmimin e Veprimeve Shoqërore, tha për Radion Evropa e Lirë se “pavarësisht numrit të madh të kandidatëve, mungojnë ide të reja”, ndërsa fushatat janë të mbushura me retorikë politike dhe frikësuese.
Sipas të dhënave të KQZ-së, në këto zgjedhje kanë të drejtë vote mbi 2 milionë qytetarë, prej të cilëve afro 44 mijë janë regjistruar për të votuar nga jashtë. Në të gjithë vendin do të hapen 938 qendra votimi me gjithsej 2.625 vendvotime.
