Koha e parashikuar e leximit: 3 minuta
08 korrik 2025
Uashington, SHBA – Kryeministri i Izraelit, Benjamin Netanyahu, gjatë një takimi zyrtar me Presidentin amerikan Donald Trump në Shtëpinë e Bardhë, deklaroi se ka dërguar një letër zyrtare për të propozuar Trump për Çmimin Nobel për Paqen. Ai vlerësoi përpjekjet e presidentit amerikan për t’i dhënë fund konfliktit në Rripin e Gazës dhe për të rivendosur paqen në rajon.
“Presidenti Trump po sjell paqe në shumë vende dhe rajone. Ai meriton vlerësim ndërkombëtar për këtë angazhim,” tha Netanyahu. Takimi në Shtëpinë e Bardhë ishte vizita e tretë e Netanyahu që nga rikthimi i Trump në presidencë dhe u zhvillua në një moment kyç, pas një armëpushimi që i dha fund një konflikti 12-ditor mes Izraelit dhe Iranit.
Në fjalën e tij, Trump u shpreh optimist për një marrëveshje të qëndrueshme armëpushimi. “Gjërat po shkojnë shumë mirë. Hamasi dëshiron armëpushim, kërkon marrëveshje dhe takim,” deklaroi presidenti amerikan, teksa dy liderët darkonin së bashku në Shtëpinë e Bardhë.
Ndërkohë, negociatat e ndërmjetësuara nga Katari, Egjipti dhe SHBA-të mes Izraelit dhe Hamasit po zhvillohen në mënyrë të tërthortë në Doha. Sipas burimeve palestineze, janë mbajtur dy raunde bisedimesh, por ende pa ndonjë përparim domethënës.
Pavarësisht përpjekjeve diplomatike, situata në terren mbetet e tensionuar. Ushtria izraelite raportoi të hënën për pesë ushtarë të vrarë dhe dy të plagosur rëndë në luftime në veri të Gazës.
I dërguari special amerikan, Steve Witkoff, pritet të mbërrijë këtë javë në Uashington për të ndjekur nga afër zhvillimet. Zëdhënësja e Shtëpisë së Bardhë, Caroline Leavitt, theksoi se prioriteti kryesor i administratës Trump është përfundimi i konfliktit dhe kthimi i pengjeve në shtëpi. Trump vetë deklaroi të dielën se “ekziston një mundësi reale për një marrëveshje brenda kësaj jave”.
Propozimi aktual që diskutohet parashikon një armëpushim 60-ditor dhe përfshin lirimin e rreth gjysmës së pengjeve të gjalla në Gaza, si dhe kthimin e trupave të pajetë në këmbim të lirimit të të burgosurve palestinezë nga Izraeli.
Në një deklaratë të mëvonshme, Netanyahu përjashtoi sërish mundësinë për krijimin e një shteti palestinez, duke theksuar se Izraeli do të mbajë “përgjithmonë” kontrollin e sigurisë në Rripin e Gazës. “Ata ndërtuan tunelë terrori, jo një shtet. Nuk do të lejojmë krijimin e një platforme për shkatërrimin e Izraelit,” tha ai, duke iu referuar sulmeve të 7 tetorit.
