Koha e parashikuar e leximit: 2 minuta
11 mars 2025
Presidentja e Komisionit Evropian, Ursula von der Leyen, është shprehur gjatë fjalimit të saj në seancën plenare të Parlamentit Evropian në Strasburg, se Evropa nuk mund ta marrë më paqen si të mirëqenë dhe se duhet të forcojnë mbrojtjen.
“Paqja në Bashkimin tonë Evropian nuk mund të merret më si e mirëqenë. Ne po përballemi me një krizë të sigurisë evropiane. Por ne e dimë se kjo është kriza për të cilën Evropa është përgatitur gjithmonë. Pra, kjo është koha për paqe përmes forcës. Kjo është koha për përpjekje të përbashkëta në mbrojtje ,” vuri në dukje Von der Leyen.
Presidentja e Komisionit shtoi se gjatë Këshillit të fundit Evropian, niveli i konsensusit për çështjet e mbrojtjes midis liderëve evropianë ishte i paprecedentë dhe i paimagjinueshëm në krahasim me atë që ekzistonte deri disa javë më parë.
“Udhëheqësit evropianë e kuptuan se duhej të mendonin dhe të vepronin ndryshe në mënyrë që të mobilizonin burimet ekonomike evropiane për të forcuar sigurinë e tyre”, tha ajo. Këto përpjekje, sipas von der Leyen “do të kërkojnë vendosmëri dhe guxim në javët dhe muajt e ardhshëm”.
Ajo tha se Evropa duhet të marrë më shumë përgjegjësi për mbrojtjen e saj, jo në të ardhmen e largët, por tani. Kjo nuk kërkon disa hapa të ngadaltë në rritje, por kërkon guximin e evropianëve për të arritur një rritje të aftësive të tyre mbrojtëse.
“Ne kemi nevojë për këtë, para së gjithash, për shkak të situatës në Ukrainë. Ekziston një nevojë urgjente për të mbushur boshllëkun në furnizimet ushtarake për Ukrainën dhe për t’i dhënë Ukrainës garanci të forta sigurie. Por ky moment vendimtar nuk ka të bëjë vetëm me Ukrainën. Kjo ka të bëjë me të gjithë Evropën dhe sigurinë e të gjithë kontinentit tonë,” theksoi von der Leyen
