Koha e parashikuar e leximit: 2 minuta
09 dhjetor 2025
Kryeministri polak Donald Tusk ka tërhequr vëmendje të jashtëzakonshme në platformën X, ku postimi i tij i fundit ka arritur mbi 27 milionë shikime brenda 24 orëve – një rezultat i rrallë në një hapësirë ku konkurrenca për vëmendje është e ashpër.
Mesazhi i Tusk ishte i drejtpërdrejtë dhe i adresuar publikut amerikan. Ai theksoi se Evropa mbetet aleati më i besueshëm i SHBA-ve dhe se të dyja palët ndajnë të njëjtët armiq prej më shumë se 80 vitesh. “Duhet t’i përmbahemi kësaj. Është e vetmja strategji e arsyeshme për sigurinë tonë të përbashkët”, shkroi ai.
Reagimi i Tusk erdhi menjëherë pas publikimit të Strategjisë së re të Sigurisë Kombëtare të SHBA-ve, një dokument që ka shkaktuar debat në kryeqytetet evropiane. Strategjia e re thekson nevojën që Evropa të marrë më shumë përgjegjësi për mbrojtjen e saj, vë në diskutim zgjerimin e pakufizuar të NATO-s dhe nënvizon interesin amerikan për të ruajtur stabilitet në marrëdhëniet me Rusinë.
Postimi i kryeministrit polak u interpretua gjerësisht si një paralajmërim politik dhe një thirrje për të ruajtur bashkëpunimin transatlantik që ka garantuar sigurinë perëndimore për dekada të tëra.
