Koha e parashikuar e leximit: 2 minuta
13 gusht 2025
Të enjten (7 gusht), në SHBA hynë në fuqi tarifat e reja doganore që pritet të godasin rëndë mallrat luksoze dhe të konsumit nga Zvicra, përfshirë orët, produktet kozmetike, instrumentet precize dhe çokollatat. Si pasojë, këto produkte do të bëhen ndjeshëm më të shtrenjta për konsumatorët amerikanë.
Në fokus të debatit është edhe tregtia e arit, një sektor i rëndësishëm për ekonominë zvicerane, por i keqkuptuar në analizat amerikane. Edhe pse ari, argjendi dhe produktet farmaceutike janë të përjashtuara nga tarifat, përpunimi i arit në Zvicër ka tërhequr vëmendjen e autoriteteve amerikane për shkak të ndikimit të madh që ka në bilancin tregtar në letër.
Çdo vit, përmes Zvicrës kalojnë mbi 2,000 ton ar, kryesisht i importuar nga qendrat financiare si Londra dhe Nju Jorku, për t’u përpunuar dhe më pas rieksportuar. Edhe pse vlera e tregtisë së arit me SHBA-në ka kapur shifrën e 36 miliardë dollarëve në tremujorin e parë të vitit, fitimi real për rafineritë zvicerane mbetet modest – vetëm disa qindra milionë në vit.
Banka Kombëtare Zvicerane ka theksuar se përfshirja e arit në llogaritë tregtare jep një pasqyrë të shtrembëruar të suficitit me SHBA-në, pasi vlera përpunuese që mbetet në Zvicër është minimale, ndërsa pjesa dërrmuese e vlerës vjen nga vetë metali.
Pavarësisht këtyre argumenteve, administrata amerikane nuk ka treguar gatishmëri për të ndryshuar qasjen e saj.
Ndërkohë, komuniteti i biznesit në Zvicër ka reaguar me shqetësim. Shoqata Economie Suisse i ka kërkuar qeverisë të intensifikojë përpjekjet diplomatike për të ulur ndikimin e tarifave. Sipas ekonomistit Hans Gersbach nga Instituti KOF në Cyrih, masat e reja mund të shkaktojnë një rënie prej 0.3% deri në 0.6% të PBB-së zvicerane në vitin e ardhshëm, nëse nuk hiqen.
Eksportuesit zviceranë rrezikojnë të humbasin konkurrueshmërinë në tregun amerikan përballë rivalëve nga BE-ja dhe Mbretëria e Bashkuar, të cilët nuk përballen me të njëjtat barriera tregtare.
