Koha e parashikuar e leximit: 2 minuta
08 shtator 2025
SPAK ka hyrë në një fazë të re të luftës kundër pastrimit të parave, duke përdorur urdhra të fshehtë për të bllokuar pasuri digjitale në formë kriptomonedhash. Mekanizmi funksionon përmes kompanive të mëdha exchange, ku kriptot kthehen në euro apo dollarë dhe bëhen të kapshme për urdhrat e gjykatës.
Çdo transaksion në blockchain është i regjistruar, por llogaritë janë anonime dhe fondet zhvendosen brenda sekondash, duke e bërë të vështirë ndalimin pa bashkëpunim ndërkombëtar. Kjo është arsyeja pse SPAK vepron në momentin e “cash out” – kur kriptot hyjnë në sistemin financiar formal.
Operacioni “Gorgon” në 2024 çoi në sekuestrimin e një portofoli me mbi 10 milionë dollarë, përmes një urdhri të fshehtë ndaj një kompanie ndërkombëtare. Pas tij, edhe operacionet “FRIDA-REFOX” dhe “Dream Earnings” treguan përdorimin e Bitcoin dhe stablecoins për të fshehur fitimet e krimit kibernetik.
Burime jozyrtare sugjerojnë se janë lëshuar dhjetëra urdhra të tillë, me vlera që arrijnë deri në 50 milionë euro. Por ndërsa bllokimet janë efikase, transparenca mbetet problem: nuk ka bilanc publik për sa llogari janë sekuestruar përfundimisht dhe sa janë liruar.
Kjo metodë e ndjekur nga SHBA dhe BE përbën një hap të madh për Shqipërinë në luftën kundër krimit ekonomik, por duhet shoqëruar me më shumë transparencë për të garantuar besimin publik dhe llogaridhënien.
