Labubu – kur një lodër bëhet pasqyrë e shoqërisë moderne
Koha e parashikuar e leximit: 2 minuta
Në një analizë të thelluar dhe të mprehtë, sociologu Jeton Brajshori hedh dritë mbi një fenomen global që, në pamje të parë, duket i pakuptimtë: trendi i lodrave Labubu. Ajo që duket si një lodër “cute”, madje sipas Brajshorit me pamje paksa djallëzore, është shndërruar në një objekt koleksionimi me vlerë simbolike – më shumë për status sesa për funksion.
Brajshori e ndërlidh këtë dukuri me psikologjinë e turmës dhe konceptet sociologjike të Pierre Bourdieu, duke argumentuar se në një shoqëri të udhëhequr nga rrjetet sociale dhe ndikimi i figurave publike, vlera e një objekti matet me sytë e të tjerëve, jo me përdorimin e tij praktik.
A nuk është kjo edhe arsyeja pse dikur kishim fidget spinner në çdo cep, e tani janë zhdukur pa gjurmë? Sipas Brajshorit, ky është kapitali simbolik në veprim – një garë për të qenë “në rrymë”, për të mos mbetur pas, për të fituar aprovim shoqëror.
Në një kohë kur FOMO (frika për të mbetur jashtë) udhëheq zgjedhjet tona, Labubu është thjesht simboli më i fundit i një realiteti të përhershëm: njerëzit nuk ndjekin objekte, por ndjekin mesazhin që ato japin për identitetin e tyre.
Postimi i sociologut Brajshori nuk është vetëm për një lodër – është një pasqyrë e thellë mbi mënyrën se si shoqëria moderne ndërton vlera, shpesh në mënyrë sipërfaqësore, por me ndikim të madh.
E siç thotë Sting në këngën e tij:
“Be yourself, no matter what they say…”
