Koha e parashikuar e leximit: 2 minuta
28 janar 2026
Një pjesë e madhe e Shteteve të Bashkuara po përballet me të ftohtë ekstrem, pas kalimit të një stuhie të fuqishme dimërore që ka shkaktuar dhjetëra viktima, ndërprerje masive të energjisë elektrike dhe ka paralizuar transportin ajror. Një valë e dytë e motit të acartë pritet gjatë fundjavës, duke rritur shqetësimet për pasoja edhe më të rënda.
Sipas një bilanci të përpiluar nga AFP mbi të dhënat e autoriteteve dhe mediave lokale, të paktën 38 persona kanë humbur jetën si pasojë e kushteve ekstreme, përfshirë aksidente dhe hipotermi. Mes viktimave janë edhe tre fëmijë në Teksas që ranë në një liqen të ngrirë, ndërsa në Nju Jork u gjetën të paktën dhjetë persona të pajetë në hapësira të jashtme.
Stuhia ka shkaktuar ndërprerje të mëdha të energjisë elektrike, veçanërisht në jug të vendit, përfshirë Tenesin, Teksasin, Misisipin dhe Luizianën. Deri të martën në mbrëmje, rreth gjysmë milioni familje dhe biznese vazhdonin të ishin pa rrymë, sipas të dhënave të PowerOutage.com.
Situata ka krijuar kaos në transportin ajror, me aeroporte të mëdha si ato të Uashingtonit, Filadelfias dhe Nju Jorkut që kanë pezulluar pjesërisht funksionimin. Që nga e shtuna, më shumë se 22 mijë fluturime janë anuluar, duke përfshirë mbi 9 mijë vetëm të dielën – një shifër rekord që nga fillimi i pandemisë.
Meteorologët paralajmërojnë se temperaturat do të mbeten nën zero në shumë shtete veriore deri të dielën, ndërsa një sistem i ri i ftohtë nga Kanadaja mund të sjellë reshje të reja bore dhe shiu në bregun lindor. Autoritetet kanë paralajmëruar se disa zona, veçanërisht në jug, nuk janë të përgatitura për kushte kaq të ashpra dimërore, duke rritur rrezikun për pasoja të tjera serioze.
