Koha e parashikuar e leximit: 2 minuta
24 dhjetor 2025
Administrata e presidentit Donald Trump ka vendosur të martën ndalime vizash ndaj një ish-komisioneri të Bashkimit Evropian dhe disa aktivistëve kundër dezinformimit, të cilët Uashingtoni i akuzon për përfshirje në censurimin e platformave amerikane të rrjeteve sociale. Ky veprim konsiderohet si hapi më i fundit në përplasjen mes SHBA-së dhe BE-së lidhur me rregullat evropiane për hapësirën digjitale, të cilat autoritetet amerikane i cilësojnë si tejkalim të rregullimit legjitim.
Sipas burimeve zyrtare, administrata Trump ka udhëzuar diplomatët amerikanë të kundërshtojnë Aktin e Shërbimeve Digjitale (DSA) të Bashkimit Evropian – një ligj që synon luftimin e gjuhës së urrejtjes, keqinformimit dhe dezinformimit online. Uashingtoni argumenton se ky ligj kufizon lirinë e shprehjes dhe vendos barrë të konsiderueshme financiare mbi kompanitë amerikane të teknologjisë.
Vendimi për ndalimet e vizave vjen pas publikimit të Strategjisë së Sigurisë Kombëtare të administratës Trump, ku pretendohet se disa liderë evropianë po censurojnë fjalën e lirë dhe po shtypin kundërshtimin ndaj politikave të emigracionit, duke rrezikuar, sipas dokumentit, “zhdukjen civilizuese” të Evropës, raporton Reuters.
Sekretari amerikan i Shtetit, Marco Rubio, deklaroi se pesë persona të prekur nga masat “kanë udhëhequr përpjekje të organizuara për të detyruar platformat amerikane të censurojnë, të demonetizojnë dhe të shtypin pikëpamje që nuk përputhen me bindjet e tyre”. Ai i cilësoi këto veprime si ndërhyrje të huaja ndaj folësve dhe kompanive amerikane.
Ndërsa Rubio nuk publikoi emrat e personave të sanksionuar, nënsekretarja për Diplomaci Publike, Sarah Rogers, i identifikoi ata në rrjetin social X, duke i akuzuar se kanë nxitur censurimin e fjalës amerikane. Mes figurave më të njohura të përfshira është Thierry Breton, ish-komisioner evropian për tregun e brendshëm nga viti 2019 deri në 2024, të cilin Rogers e përshkroi si arkitektin kryesor të DSA-së dhe e akuzoi se kishte kërcënuar pronarin e X, Elon Musk, përpara një interviste të këtij të fundit me Donald Trump.
