Koha e parashikuar e leximit: 2 minuta
16 dhjetor 2025
Presidenti serb, Aleksandar Vuçiq, ka deklaruar se Serbia do të humbasë të paktën 750 milionë euro pasi Jared Kushner, dhëndri i ish-presidentit amerikan Donald Trump, tërhiqet nga ndërtimi i një hoteli luksoz në vendin e ish-godinës së Shtabit të Përgjithshëm të Ushtrisë Jugosllave në Beograd. Ajo ndërtesë u shkatërrua gjatë bombardimeve të NATO-s në vitin 1999, dhe kompania e Kushnerit, “Affinity Partners”, kishte planifikuar një investim të madh aty.
Sipas Vuçiqit, vendimi i tërheqjes u nxiti nga aktakuza e ngritur nga Prokuroria Publike për Krim të Organizuar ndaj ministrit aktual të Kulturës, Nikolla Selakoviq. Selakoviq akuzohet për keqpërdorim të detyrës zyrtare dhe falsifikim dokumentesh gjatë heqjes së statusit të pronësisë së objekteve të mbrojtura të trashëgimisë kulturore mbi ish-ndërtesën e Shtabit të Përgjithshëm.
Presidenti serb ka kritikuar ashpër veprimet e autoriteteve dhe i ka quajtur ato si pengesa ndaj investimeve të huaja, duke deklaruar se bllokimi i projektit ka shkaktuar humbje minimale prej 750 milionë eurosh dhe dëme të tjera që mund të arrijnë deri në 1.5 miliardë euro.
“Fushata kundër Shtabit të Përgjithshëm ka nisur si përpjekje për të penguar njerëzit që punonin me përgjegjësi. Qëllimi i tyre duket të jetë shkatërrimi i investimeve dhe dobësimi i ekonomisë së Serbisë,” tha Vuçiq gjatë një konference për media, duke vlerësuar se çështja po bëhet problem publik vetëm tani.
