Koha e parashikuar e leximit: 2 minuta
14 maj 2025
Ministria e Shëndetësisë e Gazës tha po ashtu se 119.846 persona janë plagosur deri më tani në luftën gjenocidale të Izraelit.
Të paktën 52.928 palestinezë janë vrarë në luftën gjenocidale të Izraelit në Rripin e Gazës që nga tetori i vitit 2023, tha sot Ministria e Shëndetësisë e enklavës palestineze, transmeton Anadolu.
Në një deklaratë mbi shifrat e fundit të viktimave nga sulmet izraelite, ministria tha po ashtu se 119.846 persona janë plagosur deri më tani në luftën gjenocidale të Izraelit në Gaza.
“Shumë viktima janë ende të bllokuara nën rrënoja dhe në rrugë pasi ekipet e shpëtimit nuk janë në gjendje t’i arrijnë”, shtoi ajo.
Ushtria izraelite rifilloi sulmet e saj në Rripin e Gazës më 18 mars dhe që atëherë ka vrarë gati 2.800 persona dhe ka plagosur mbi 7.800 të tjerë, duke prishur një marrëveshje armëpushimi dhe shkëmbimi të të burgosurve që hyri në fuqi në janar.
Nëntorin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
