Koha e parashikuar e leximit: 3 minuta
03 dhjetor 2025
Më shumë se 2,000 postime skajshmërisht abuzive – përfshirë kërcënime me vdekje dhe përdhunim – janë dërguar kundër trajnerëve dhe futbollistëve të Premier League dhe Super League të Grave vetëm gjatë një fundjave, transmeton BBC, përcjell Lapsiinfo.
Analiza – e zhvilluar së bashku me kompaninë e shkencës së të dhënave Signify u fokusua te postimet e publikuara gjatë 10 ndeshjeve të Premier League dhe gjashtë sfidave të WSL në datat 8 dhe 9 nëntor. Studimi gjeti gjithashtu mesazhe me përmbajtje raciste, homofobe dhe me kërcënime të drejtpërdrejta për dhunë.
Menaxherët rezultuan të ishin më të shënjestruari sesa vetë lojtarët, me 82% të abuzimeve të publikuara në platformën X (ish-Twitter).
Në Premier League, trajnerët Ruben Amorim, Arne Slot dhe Eddie Howe ishin objektivat më të shpeshtë të sulmeve online, ndërsa te futbolli i femrave, Chelsea dhe trajnerja Sonia Bompastor morën gjysmën e totalit të abuzimeve të regjistruara në WSL.
Nga të gjitha mesazhet, 61% u dërguan nga llogari të bazuara në Mbretërinë e Bashkuar dhe Republikën e Irlandës, me të dhënat që sugjerojnë se ky fenomen po rritet.
‘Pandëshkueshmëri digjitale’: Kur ekrani kthehet në maskë
“Abuzimi nuk është kurrë i pranueshëm, qoftë ndaj meje apo ndaj çdo trajneri tjetër,” u shpreh trajneri i Liverpool-it, Arne Slot.
“Ne e dimë që kritikat janë pjesë e punës. Unë vetë nuk kam rrjete sociale dhe nuk i shoh këto komente, por e kuptoj mirë që ekzistojnë.”
Threat Matrix: Algoritmi që zbulon errësirën e rrjeteve
Signify përdor një sistem inteligjence artificiale të quajtur Threat Matrix, i cili skanon postimet në rrjete sociale për të identifikuar përmbajtje abuzive.
Gjatë fundjavës së monitoruar, u analizuan mbi 500,000 postime nga X, Instagram, Facebook dhe TikTok, të cilat gjeneruan 22,389 sinjalizime për abuzim.
Megjithatë, jo çdo sinjalizim është real – për shembull, postimet që përmendin mbrojtësin Dan Burn mund të interpretohen gabimisht si kërcënime për shkak të mbiemrit të tij.
Për këtë arsye, u realizua një verifikim dypalësh nga ekspertë njerëzorë, duke konfirmuar se 2,015 postime përmbanin abuzim ekstrem të vërtetuar, si kërcënime për jetën apo gjuhë të urrejtjes, duke shkelur qartësisht rregullat e platformave.
Çfarë po qarkullon vërtet online? Fjalët që djegin më shumë se loja
Më poshtë përfshihen disa pamje të ekranit të postimeve që përmbajnë gjuhë të rëndë, të mbledhura gjatë hetimit.
U vendos me kujdes nëse duhej të përfshiheshin, por në fund u konsiderua e rëndësishme që publiku të shihte realitetin e përmbajtjeve që qarkullojnë në internet për të kuptuar plotësisht përmasat e fenomenit.
Shih fotot:
