Koha e parashikuar e leximit: 2 minuta
21 mars 2025
Prokuroria Themelore Publike e Koçanit njofton se ka lëshuar urdhër për zhvillimin e procedurës hetimore ndaj 27 personave fizik dhe tre personave juridikë për të cilët ekziston dyshimi i bazuar se si bashkëkryerës kanë kryer veprën penale “Krime të rënda kundër sigurisë publike” nga neni 292 lidhur me nenin 288 të Kodit Penal.
Nga Prokuroria thonë se të gjithë të dyshuarit në periudhën nga viti 2012 deri më 16.03.2025, bashkërisht por secili për nga aspekti, kompetencat dhe përgjegjësitë e tyre, nuk kanë vepruar fare në përputhje me rregulloret për masat mbrojtëse dhe në këtë mënyrë kanë shkaktuar rrezik për jetën dhe trupin e njerëzve dhe pasurisë në përmasa të mëdha.
“Zinxhiri i mosveprimeve dhe veprimeve të kundërligjshme të personave përgjegjës dhe zyrtarë ka çuar në përdorimin e mjeteve piroteknike më 16 mars 2025, gjatë performancës së grupit muzikor DNA në kabarenë “CLUB PULSE” në Koçan, duke shkaktuar zjarrin në të cilin humbën jetën 59 persona, mes të cilëve 6 fëmijë, dhe 192 të tjerë u lënduan, mes tyre 25 fëmijë. Nëse sigurohen prova, hetimi do të përfshijë edhe individë të tjerë të paidentifikuar aktualisht, të cilët, megjithëse ishin të vetëdijshëm se veprimet dhe mosveprimet e tyre mund të rezultonin në një pasojë të dëmshme, ranë dakord për shfaqjen e saj dhe kontribuan në rezultatin katastrofik”.
