Koha e parashikuar e leximit: 3 minuta
09 korrik 2025
Sekretari amerikan i Mbrojtjes, Pete Hegseth, nuk e kishte informuar Shtëpinë e Bardhë përpara se të autorizonte një ndalesë për dërgesat e armëve në Ukrainë javën e kaluar, sipas pesë burimeve të njohura me çështjen.
Kjo situatë ka shkaktuar përplasje brenda administratës, ndërsa zyrtarët po përpiqen të kuptojnë arsyet e ndalesës dhe t’ia shpjegojnë atë Kongresit dhe qeverisë ukrainase, raporton CNN.
Presidenti amerikan, Donald Trump, ka thënë se ai nuk ishte përgjegjës për këtë veprim. I pyetur të martën gjatë një mbledhjeje të kabinetit se kush e autorizoi ndalesën, Trumpi është përgjigjur se nuk e dinte.
Ky është rasti i dytë këtë vit që Hegseth vendos të ndalojë dërgesat e armëve për Ukrainën. Hera e parë ishte në shkurt, por sipas tri burimeve, vendimi u anulua shpejt, ngjashëm me atë që ndodhi të hënën në mbrëmje, kur Trumpi njoftoi se dërgesat e armëve do të vazhdojnë, pavarësisht se Hegseth kishte miratuar pauzën.
Gjenerali në pension Keith Kellogg, i dërguari special i SHBA-së në Ukrainë, dhe sekretari i Shtetit Marco Rubio, i cili është gjithashtu këshilltari i sigurisë kombëtare i Trumpit, nuk ishin njoftuar paraprakisht për pauzën dhe mësuan për të nga raportet e shtypit, sipas një zyrtari të lartë të administratës dhe dy burimeve.
E pyetur nëse Hegseth e informoi Shtëpinë e Bardhë para se të miratonte pauzën, sekretarja e shtypit e Shtëpisë së Bardhë, Karoline Leavitt, ka thënë në një deklaratë se Pentagoni kreu një rishikim “për të siguruar që e gjithë mbështetja që shkon në të gjitha vendet e huaja përputhet me interesat e Amerikës”, dhe ka shtuar se Trumpi “ka marrë vendimin për të vazhduar furnizimin me armë mbrojtëse për Ukrainën për të ndihmuar në ndalimin e vrasjeve në këtë luftë brutale, për të cilën Pentagoni ka thënë se po punon në mënyrë aktive”.
Ajo ka shtuar se “presidenti ka besim të plotë te Sekretari i Mbrojtjes”.
Dy nga burimet ia atribuojnë mungesën e koordinimit faktit se Hegseth nuk ka shef stafi apo këshilltarë të besuar përreth tij që mund ta nxisin të koordinojë më mirë vendimet e mëdha politike me partnerët ndëragjencialë
