Koha e parashikuar e leximit: 2 minuta
13 maj 2025
Komisioneri i Lartë i OKB-së për të Drejtat e Njeriut, Volker Türk tha se dëbimi i një numri të madh shtetasish të huaj nga SHBA-ja në muajt e fundit ka ngritur shqetësime në lidhje me shkeljet e të drejtave të njeriut.
Komisioneri i Lartë i Kombeve të Bashkuara për të Drejtat e Njeriut, Volker Türk, ka shprehur shqetësim lidhur me dëbimin e një numri të madh shtetasish të huaj nga Shtetet e Bashkuara gjatë muajve të fundit, duke e cilësuar këtë si një çështje që ngre probleme serioze për respektimin e të drejtave të njeriut.
Në një deklaratë me shkrim, Türk theksoi se sipas të dhënave zyrtare të autoriteteve amerikane, nga 20 janari deri më 29 prill janë deportuar rreth 142 mijë persona.
Ai vuri në dukje se mbetet e paqartë se ku ndodhen dhe çfarë ka ndodhur me të paktën 245 shtetas venezuelianë dhe rreth 30 shtetas salvadorianë që janë dërguar në El Salvador. “Dëbimet masive të qytetarëve të huaj, përfshirë edhe në vende që nuk janë vendet e tyre të origjinës, kanë ngritur shqetësime të thella për të drejtat e njeriut”, tha Türk.
Ai shtoi se shumë nga këta persona janë dëbuar në bazë të “Aktit për Armiqtë e Huaj”, nën dyshimet se janë të lidhur me grupe të caktuara kriminale. Sipas raportimeve, ata janë vendosur në Qendrën për Kontrollin e Terrorizmit (CECOT) në El Salvador.
“Sipas informacionit të marrë, personat e ndaluar në këtë qendër përballen me trajtim tepër të ashpër. Ata nuk kanë akses në përfaqësim ligjor, nuk mund të kontaktojnë familjarët dhe janë të izoluar nga bota e jashtme,” theksoi Türk.
Ai paralajmëroi se kjo situatë ngre shqetësime serioze për shkelje të disa të drejtave themelore, përfshirë të drejtën për një proces të rregullt ligjor, mbrojtjen nga ndalimet arbitrare, barazinë para ligjit, ndalimin e torturës dhe të drejtën për mjete juridike efektive.
