Koha e parashikuar e leximit: 2 minuta
14 korrik 2025
Ish-Presidenti Barack Obama u bëri thirrje demokratëve që të mobilizohen dhe të veprojnë, në një aktivitet privat për mbledhje fondesh të premten në mbrëmje në New Jersey. Duke folur përballë një grupi donatorësh, Obama theksoi rëndësinë e angazhimit politik në një kohë kur demokratët përballen me sfida të mëdha nën mandatin e dytë të Presidentit Donald Trump.
“Mos më thuaj se je demokrat por je i zhgënjyer dhe nuk po bën asgjë. Tani është koha për të vepruar,” tha ai, duke u bërë thirrje pjesëmarrësve që të mos dorëzohen përballë frustrimit. Ai shtoi se liria e fjalës dhe vlerat demokratike duhen mbrojtur edhe kur është e vështirë.
Obama theksoi rëndësinë e zgjedhjeve për guvernator në New Jersey dhe Virginia, duke i përshkruar kandidatet demokrate Mikie Sherrill dhe Abigail Spanberger si zëra pragmatikë dhe me përvojë në shërbim publik.
Në aktivitetin e organizuar nga Guvernatori Phil Murphy dhe bashkëshortja e tij, u mblodhën 2.5 milionë dollarë për Komitetin Kombëtar Demokrat (DNC), pjesërisht për të mbështetur garat lokale.
Duke komentuar mbi gjendjen aktuale të partisë, Obama u shpreh se demokratët duhet të përqendrohen te rezultatet konkrete për qytetarët dhe të mos mbeten në debate ideologjike që pengojnë zbatimin e politikave. Ai kritikoi gjithashtu politikat kufizuese të banesave dhe zonimin, duke thënë se “ideologjia nuk ka rëndësi kur nuk mund të ndërtosh asgjë”.
