Koha e parashikuar e leximit: 2 minuta
10 shkurt 2026
Kryeministri izraelit Benjamin Netanyahu ka vendosur ta sjellë më herët se sa ishte planifikuar takimin me presidentin amerikan Donald Trump, në një kohë kur Tel Avivi shpreh shqetësim për drejtimin që mund të marrin bisedimet bërthamore mes SHBA-së dhe Iranit.
Netanyahu u nis të martën drejt Uashingtonit, ku pritet të takohet me Trump, me qëllim që t’i përcjellë drejtpërdrejt qëndrimin e Izraelit mbi negociatat me Teheranin. Para nisjes, ai u tha gazetarëve se do t’i paraqesë presidentit amerikan “qasjen dhe parimet e Izraelit lidhur me këto bisedime”, duke theksuar se ato janë thelbësore jo vetëm për Izraelin, por për çdo vend që synon paqe dhe siguri.
Takimi ishte parashikuar fillimisht të zhvillohej më vonë gjatë muajit, por u përshpejtua dhe u caktua për të mërkurën, një lëvizje që analistët e kanë interpretuar si shenjë ankthi për zhvillimet e fundit diplomatike me Iranin.
Sipas Netanyahu-t, në takim do të diskutohen disa çështje, përfshirë situatën në Gaza, ndërsa ai vlerësoi se takimet e shpeshta me Trump pasqyrojnë “afërsinë unike” mes Izraelit dhe Shteteve të Bashkuara, si dhe marrëdhënien personale mes dy liderëve.
Një zyrtar izraelit i tha gazetës The Times of Israel se udhëtimi i kryeministrit ka për synim ndikimin direkt në negociatat me Iranin. Sipas tij, Izraeli beson se çdo marrëveshje duhet jo vetëm të ndalojë riarmatimin bërthamor dhe pasurimin e uraniumit, por edhe të kufizojë programin e raketave balistike dhe të ndalë mbështetjen e Iranit për grupet terroriste.
Ndërkohë, raportohet se Netanyahu e përshpejtoi takimin për t’i paraqitur Trump-it personalisht të dhëna të reja të inteligjencës izraelite mbi aktivitetet e Iranit.
