Ministri gjerman i Mbrojtjes, Boris Pistorius, ka ngritur alarmin për një rritje të ndjeshme të kërcënimit rus ndaj Evropës, gjatë Konferencës së Sigurisë që po zhvillohet në Berlin. Ai paralajmëroi se Deti Baltik, dikur një urë lidhëse mes vendeve evropiane, po shndërrohet me shpejtësi në një zonë të hapur konfrontimi.
Koha e parashikuar e leximit: 2 minuta
Sipas Pistoriusit, Rusia po teston kapacitetet mbrojtëse të Evropës përmes incidenteve të përsëritura, përfshirë dëmtimin e kabllove nënujore, shkeljet e hapësirës ajrore dhe fluturimet e dronëve. “Nuk mund të flasim më për rastësi. Kjo është strategji. Këto janë sinjale,” tha ai, duke theksuar se Moska tashmë po zhvillon sulme hibride ndaj vendeve evropiane – nga kibernetika te sabotimi e dezinformimi.
Në kuadër të konferencës, Pistoriusi nënshkroi një marrëveshje me ministrin suedez të mbrojtjes, Pål Jonson, për të forcuar bashkëpunimin ushtarak me shtetin e ri anëtar të NATO-s. Po ashtu, holandezi Martin Bonn u gradua gjeneral-major dhe do të shërbejë si zëvendëskomandant i trupave luftarake gjermane – një tjetër hap drejt thellimit të bashkëpunimit ushtarak.
Nga ana tjetër, gjenerali i NATO-s, Ingo Gerhartz, i bëri thirrje Gjermanisë të rrisë ndjeshëm përpjekjet për të parandaluar një sulm të mundshëm rus. Ai kërkoi reforma të shpejta në sistemin e prokurimit, zbatimin e shërbimit të ri ushtarak dhe forcimin e gatishmërisë mbrojtëse në të gjithë shoqërinë. “Gjermania ende nuk ka arritur pjekurinë strategjike që kërkon koha jonë,” paralajmëroi ai.
Gerhartz theksoi se NATO duhet të jetë në gjendje të frikësojë kundërshtarët “përmes Gjermanisë”, duke ngritur nevojën për diskutime të reja mbi mënyrën sesi funksionon frikësimi në “zonën gri” të sulmeve hibride dhe në kuadër të Nenit 5 të aleancës.
Konferenca dyditore e Sigurisë në Berlin mbledh mbi 140 ekspertë, politikanë dhe ushtarakë, të cilët do të diskutojnë forcimin e mbrojtjes evropiane dhe sfidat e sigurisë me të cilat përballen NATO dhe BE.
