Koha e parashikuar e leximit: 2 minuta
05 dhjetor 2025
Meta po redukton një pjesë të investimeve në metaverse dhe po i orienton ato drejt syzeve dhe pajisjeve të veshshme të fuqizuara nga inteligjenca artificiale, duke synuar të shfrytëzojë rritjen e kërkesës në këtë sektor, ka bërë të ditur një zëdhënës i kompanisë.
Gjatë viteve të fundit, kompania ka investuar miliarda dollarë për të zhvilluar metaversin – një hapësirë virtuale ku përdoruesit mund të ndërveprojnë nëpërmjet realitetit virtual. Por Meta ka hasur vështirësi në bindjen e investitorëve se teknologjia është e qëndrueshme në afat të gjatë.
Sipas raportimit fillestar të Bloomberg, Meta pritet të ulë investimet në metaverse deri në 30%. Pas publikimit të lajmit, vlera e aksioneve u rrit me mbi 3.4%.
Ndryshimi i fokusit drejt Metaverse ishte arsyeja kryesore që Facebook u riemërua në Meta në vitin 2021. Zëdhënësi i kompanisë tha se nuk parashikohen ndryshime më të gjera përtej këtij rishpërndarjeje investimesh, por nuk komentoi nëse ajo mund të çojë në shkurtime të vendeve të punës.
Tani Meta po përpiqet të forcojë pozicionin e saj në tregun e syzeve inteligjente, të cilat morën komente pozitive pas modeleve të fundit të prezantuara në shtator. Këto syze përfshijnë një ekran të vogël të integruar që mund të përshkruajë atë që sheh përdoruesi dhe të përkthejë tekst, duke u konsideruar si një hap përpara në komoditet dhe funksionalitet.
Industrisë së syzeve të zgjuara i janë bashkuar edhe prodhues të tjerë globalë, përfshirë kompani kineze, të cilat po garojnë për të zhvilluar pajisje të avancuara të veshshme.
Meta ka vite që përballet me skepticizëm nga investitorët lidhur me vizionin e metaverse-it, përfshirë kërkesën e ulët për kufje të realitetit virtual – element kyç i kësaj teknologjie. Kompania ka investuar shumë në këto pajisje si dhe në platformën me avatarë Horizon Worlds.
Ndërkohë që kërkesa globale për inteligjencën artificiale po rritet, Meta ka filluar të zhvendosë prioritetet drejt zhvillimit të modeleve të avancuara të IA-s, përfshirë teknologjitë e integruara në WhatsApp dhe pajisjet e reja inteligjente.
