Koha e parashikuar e leximit: 2 minuta
16 dhjetor 2025
Gazeta e pavarur serbe “Vreme”, e njohur për qasje liberale dhe anti-pushtetare në Serbi, ka shkruar për diskriminimin e rëndë të shqiptarëve në Luginë të Preshevës.
Komuniteti shqiptar në Serbi po përballet me probleme të ndryshme që lidhen me regjistrimin dhe njohjen e të drejtave të tyre. Nga pasivizimi i adresave dhe mosnjohja e diplomave universitare, deri te përdorimi i gjuhës së urrejtjes, shqiptarët në këtë vend përjetojnë një trajtim të pabarabartë.
Një burim për gazetën Vreme shpjegon se praktikat e regjistrimit shpesh janë selektive: “Policia kontrollon tri herë nëse dikush ndodhet në adresë. Nëse nuk e gjen aty, personi fshihet nga regjistri. Për shembull, një shqiptar që ndodhet jashtë vendit për një muaj mund të fshihet, ndërsa serbët që punojnë në Beograd ose Nishë nuk përballen me këtë problem.”
Regjistrimi i vitit 2022 tregon se në Serbi jetojnë 61,687 shqiptarë, sipas të dhënave të Zyrës së Statistikave të Republikës (RSO), një rritje e dukshme krahasuar me vitin 2011, kur për shkak të bojkotit të shumicës së shqiptarëve, rezultati ishte vetëm 5,809 banorë.
Shumica e komunitetit shqiptar janë të përqendruar në Preshevë (31,340 nga 33,449 banorë) dhe Bujanoc (25,465 nga 41,068 banorë). Në total, në rajonin e Serbisë Jugore dhe Lindore, komuniteti shqiptar përbën 58,145 banorë, sipas të dhënave zyrtare të RSO-së.
