Koha e parashikuar e leximit: 2 minuta
05 dhjetor 2025
Përzgjedhësi i Kombëtares së Kosovës, Franco Foda, shprehu optimizëm për mundësinë historike të “Dardanëve” për të kualifikuar në Kupën e Botës 2026. Intervista u zhvillua të enjten në Washington, para Shtëpisë së Bardhë, një ditë para shortit për Botërorin që do të mbahet në SHBA, Meksikë dhe Kanada.
“Edhe pse nuk jemi zyrtarisht aty, besimi ekziston. Duhet të fitojmë dy ndeshje dhe ne besojmë se mund t’i fitojmë,” tha Foda, duke theksuar rëndësinë e shortit dhe atmosferës që krijon ai.
Kosova më 26 mars do të luajë gjysmëfinalen e plejofit kundër Sllovakisë në Bratislavë, ndërsa fituesi do të ndeshet më 31 mars me fituesin e çiftit Turqi–Rumani. Një triumf në të dyja ndeshjet do të sigurojë kualifikimin e parë të Kosovës në një Botëror që nga pranimi në FIFA.
Foda vlerësoi performancën e qëndrueshme kualifikuese të Kosovës dhe integrimin e lojtarëve të rinj si Fisnik Asllani dhe Albian Hajdari nga Hoffenheim. “Prurjet e reja kanë qenë vendimtare. Asllani dhe Hajdari e kanë ngritur nivelin e ekipit. Sot kemi një ekuilibër shumë të mirë mes lojtarëve të rinj dhe atyre me përvojë,” shtoi tekniku gjerman.
Ai rikujtoi fitoret e rëndësishme kundër Suedisë, Sllovenisë dhe Islandës, duke vlerësuar progresin dhe formën e mirë të ekipit para sfidave të plejofit. Duke komentuar për Sllovakinë, Foda tha: “Sllovakia fitoi 2:0 ndaj Gjermanisë, por nëse duam të jemi në Kupën e Botës, duhet t’i fitojmë të dyja ndeshjet. Jemi më të vetëbesuar se kurrë dhe besojmë se mund t’i mposhtim këto ekipe.”
Për Fisnik Asllanin, Foda theksoi: “Ka interesim nga Bayern Munich dhe Dortmund, dhe ai e meriton. Është inteligjent, i shpejtë në hapësira të ngushta, teknikisht shumë i fortë dhe shënon gola të rëndësishëm. Për këtë arsye ishte kaq e rëndësishme ta bindnim të luante për Kosovën.”
