Koha e parashikuar e leximit: 3 minuta
23 janar 2026
Të dërguarit e Presidentit të Shteteve të Bashkuara, Donald Trump, kanë zhvilluar një takim disaorësh me Presidentin rus Vladimir Putin në Kremlin, në kuadër të përpjekjeve amerikane për të ndërmjetësuar përfundimin e luftës në Ukrainë. Takimi u mbajt një ditë përpara nisjes së një raundi të ri negociatash trepalëshe mes SHBA-së, Ukrainës dhe Rusisë, të planifikuara të zhvillohen në Abu Dhabi.
Sipas burimeve të Axios, bisedimet në Moskë zgjatën rreth katër orë dhe u fokusuan në diskutimin e propozimeve amerikane për paqe, të cilat Uashingtoni po përpiqet t’i çojë përpara paralelisht me Kievin dhe Moskën. SHBA-të raportohet se janë pranë një marrëveshjeje paraprake me Ukrainën, e cila përfshin jo vetëm ndaljen e luftës, por edhe një plan afatgjatë për rindërtimin dhe zhvillimin ekonomik të vendit pas konfliktit. Megjithatë, deri tani Rusia nuk ka dhënë një angazhim të qartë, ndonëse Putin nuk i ka refuzuar hapur propozimet.
Tema kryesore e negociatave të ardhshme pritet të jetë çështja e territorit, veçanërisht në Ukrainën lindore. Burime diplomatike bëjnë të ditur se kontrolli i territoreve do të jetë në qendër të bisedimeve në Abu Dhabi. Kremlini vazhdon të këmbëngulë se marrja e plotë e rajonit të Donbasit është kusht i domosdoshëm për një zgjidhje të qëndrueshme, një qëndrim që Ukraina e ka refuzuar vazhdimisht.
Në takimin në Moskë morën pjesë i dërguari special i Shtëpisë së Bardhë Steve Witkoff, këshilltari i lartë i Presidentit Trump dhe dhëndri i tij Jared Kushner, si dhe zyrtari amerikan Josh Gruenbaum. Ata udhëtuan drejt Moskës nga Davosi, menjëherë pas takimit që Donald Trump zhvilloi me Presidentin ukrainas Volodymyr Zelensky.
Pas përfundimit të takimit, këshilltari i Putinit, Yuri Ushakov, deklaroi se delegacioni amerikan e informoi presidentin rus për diskutimet e zhvilluara më herët me palën ukrainase. Ai shtoi se në bisedime u prekën edhe çështje të tjera ndërkombëtare, përfshirë Groenlandën dhe nismën e Trump të quajtur “Këshilli i Paqes”.
“Diskutimet ishin të rëndësishme, konstruktive dhe shumë të sinqerta,” u shpreh Ushakov, duke theksuar se pa një marrëveshje për çështjen territoriale, nuk mund të ketë një zgjidhje afatgjatë për konfliktin në Ukrainë.
Pas largimit nga Moska, Witkoff dhe Kushner u nisën drejt Abu Dhabit, ku do të zhvillohen bisedimet trepalëshe. Sipas burimeve ukrainase, në këtë proces do të përfshihet edhe Sekretari amerikan i Ushtrisë, Dan Driscoll.
Delegacioni i Ukrainës do të udhëhiqet nga kryenegociatori Rustem Umerov, me pjesëmarrjen e shefit të inteligjencës Kirill Budanov, diplomatit Serhiy Kyslytsia dhe shefit të Shtabit të Përgjithshëm Andriy Khnatov. Nga pala ruse, në negociata pritet të marrin pjesë i dërguari special i Kremlinit Kirill Dmitriev dhe një ekip i udhëhequr nga Admirali Igor Kostyukov, kreu i inteligjencës ushtarake ruse.
