Koha e parashikuar e leximit: 3 minuta
17 prill 2025
Një raport i industrisë së mbrojtjes që pretendon se Rusia ka kërkuar një bazë të përhershme për aeroplanët e saj ushtarakë në Papuan e largët indoneziane, praktikisht në portën veriore të Australisë, ka shkaktuar bujë në Canberra.
Por në Indonezi sensacioni i vërtetë ishte kaosi që ka shkaktuar lajmi në mes të një fushate elektorale australiane.
Ekspertët e politikës së jashtme dhe sigurisë janë shumë skeptikë se Xhakarta do ta pranonte ndonjëherë një kërkesë të tillë ruse.
Për më tepër, përpjekje të tilla nuk janë asgjë e re.
Bëhet e ditur se Moska është përpjekur të sigurojë akses të përhershëm në aeroportin Biak në Papua për gati gjysmë shekulli, por nuk ia ka dalë kurrë.
Asnjë fuqi e huaj nuk ka bazë ushtarake apo akses të përhershëm në objektet ushtarake në territorin e saj dhe një pozicion i tillë garantohet nga kushtetuta e vendit.
“Mundësia që Indonezia të pranojë kërkesën ruse është shumë e ulët, pothuajse zero”, tha Rahman Yaacob, ekspert i mbrojtjes në Institutin Lowy.
“Politika e jashtme indoneziane bazohet në mos-angazhim.”
Gatra Priyandita e Institutit Australian të Politikave Strategjike është dakord: “Çdo miratim i një baze ushtarake për një fuqi të huaj do të ishte në kundërshtim me parimet themelore të politikës indoneziane.”
Pse Biak?
Megjithatë, ideja e një pranie ushtarake ruse në Biak po tërheq vëmendjen.
Indonezia, një arkipelag i madh, lidh strategjikisht Azinë Juglindore dhe Paqësorin, dhe baza ajrore Biak është vetëm 1300 kilometra larg Darvinit, ku ndodhet një bazë e rëndësishme ushtarake amerikane.
Këtë javë, Rusia vazhdoi presionin e saj diplomatik, shkruan The Guardian.
Presidenti Prabowo Subianto priti në Xhakartë zëvendëskryeministrin e parë rus Denis Manturov, me të cilin diskutoi tregtinë e lirë dhe festimin e 75 vjetorit të marrëdhënieve diplomatike.
Matthew Sussex, analist në Universitetin Kombëtar Australian, thekson se Putini dëshiron ta pozicionojë Rusinë si një “fuqi euro-paqësore”.
“Për Rusinë, një bazë në Biak do të nënkuptonte një bastion strategjik për aktivitetet e inteligjencës, kryesisht kundër bazave amerikane si Guam, dhe më pas drejt vendndodhjeve të rëndësishme në Territorin Verior të Australisë dhe Oqeanin Indian”, tha Sussex.
Afërsia e Biak me Filipinet, një aleat i ngushtë i SHBA-së, rrit më tej rëndësinë gjeostrategjike.
Një arsye tjetër për interesin rus mund të jetë projekti hapësinor i ardhshëm.
