Koha e parashikuar e leximit: 2 minuta
09 shtator 2025
Katmandu – Kryeministri i Nepalit, KP Sharma Oli, ka dhënë dorëheqjen pas përshkallëzimit të protestave të dhunshme në të gjithë vendin, të shkaktuara nga zemërimi i qytetarëve ndaj korrupsionit dhe nepotizmit në nivelet më të larta të pushtetit.
Protestat, të cilat filluan fillimisht si reagim ndaj një ndalimi të mediave sociale – tashmë i tërhequr nga qeveria – janë shndërruar në një revoltë masive kundër fenomenit të ashtuquajtur “fëmijët nepo”, që i referohet pasardhësve të zyrtarëve të lartë të cilët gëzojnë përparësi në pozita dhe mundësi, për shkak të lidhjeve familjare.
Të paktën dy persona raportohen të kenë humbur jetën në trazirat e fundit, ndërsa 19 të tjerë u vranë më herët këtë javë. Dhjetëra të plagosur janë shtruar në spitale dhe situata mbetet ende e tensionuar në kryeqytet dhe qytetet kryesore.
Turma të rinjsh kanë pushtuar rrugët e Katmandusë dhe qyteteve të tjera, duke kërkuar drejtësi, reforma dhe dorëheqjen e liderëve të korruptuar. Pamjet nga vendngjarja tregojnë përplasje të ashpra mes protestuesve dhe forcave të rendit, të cilat janë kritikuar për përdorim të tepruar force.
“Është një krizë e vërtetë politike dhe sociale,” shkruan redaktori ynë rajonal i Azisë Jugore. “Dorëheqja e Kryeministrit Oli ishte e pashmangshme në një klimë të tillë të pakënaqësisë së përgjithshme.”
Kjo është një nga krizat më të mëdha politike që ka përjetuar Nepali në dekadat e fundit, dhe komuniteti ndërkombëtar po ndjek nga afër zhvillimet në vendin e Himalajeve.
