Koha e parashikuar e leximit: 2 minuta
12 MARS 2025
Policia e Kosovës ka realizuar një operacion të suksesshëm të martën në qytetin e Mitrovicës, ku janë sekuestruar substanca narkotike dhe janë arrestuar dyshuarit për aktivitetet e paligjshme të trafikimit.
Drejtoria për Hetimin e Trafikimit të Narkotikëve – Mitrovicë eJugut ka zhvilluar operacionin e koduar “Befasia”, në bashkëpunim me Njësinë e Reagimit të Shpejtë – Mitrovicë Jug.
“Në kuadër të këtij kontrolli të planifikuar, janë gjetur dhe sekuestruar 24 qese me substancë të dyshuar narkotike të llojit kokainë me peshë totale 7.5 gram, 6 qese me substancë narkotike të llojit marihuanë me peshë totale 68.7 gram, dhe 4 tableta Ekstazi me peshë totale 2.2 gram”, njofton policia.
Përgjatë realizimit të operacionit, janë sekuestruar edhe qese të zbrazëta që përdoren për paketimin e substancave narkotike në sasi të vogla, si dhe një telefon mobil që dyshohet se është përdorur për aktivitetet e paligjshme.
“Në vendin e ngjarjes ka dalë një ekip i Krimteknikës Rajonale, i cili ka kryer fotografimin, evidentimin, matjen dhe sekuestrimin e të gjitha provave materiale. Hetuesit e DHTN-së, pas realizimit të veprimeve operative, kanë arrestuar të dyshuarin, i cili është intervistuar në prani të avokatit mbrojtës,” njoftoi Policia e Kosovës.
Poashtu në raportin e policisë, thuhet se i dyshuari kishte një dënim të formës së prerë prej 2 vitesh burgim për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, sipas nenit 267 të Kodit Penal të Republikës së Kosovës.
Prokurori Kujdestar pranë Prokurorisë Themelore të Mitrovicës është informuar mbi rastin dhe ka urdhëruar që pas intervistimit, i dyshuari të dërgohet në vuajtje të dënimit.
“Pas intervistimit, i dyshuari është dorëzuar në Stacionin Policor Mitrovica Jug, ku është dërguar për të vuajtur dënimin në Qendrën e Paraburgimit në Prishtinë,” thuhet tutje në njoftim.
Ndryshe, ky aksion është një tjetër hap në luftën e vazhdueshme të Policisë së Kosovës kundër krimeve të organizuara dhe trafikimit të narkotikëve, dhe tregon angazhimin e institucioneve të rendit dhe sigurisë për mbrojtjen e qytetarëve.
Policia e Kosovës ka theksuar angazhimin e saj për të zbuluar dhe parandaluar aktivitetet kriminale që kërcënojnë sigurinë dhe rendin publik, veçanërisht ato që rrezikojnë shëndetin e rinisë.
