Koha e parashikuar e leximit: 1 minut
17 korrik 2025
Një operacion i ndjeshëm ka nisur të enjten në Kosovë, me dyshime për përfshirje në veprën penale të spiunazhit.
Nën udhëheqjen e Prokurorisë Speciale të Republikës së Kosovës, operacioni po realizohet në bashkëpunim me Inspektoratin Policor të Kosovës dhe Agjencinë e Kosovës për Inteligjencë.
Për shkak të ndjeshmërisë së rastit, autoritetet nuk kanë dhënë detaje shtesë për lokacionet apo të dyshuarit.
“Prokuroria Speciale e Republikës së Kosovës njofton opinionin publik se nën udhëheqjen e saj, është duke u zhvilluar një operacion në bashkëpunim me Inspektoratin Policor të Kosovës dhe Agjencinë e Kosovës për Intelegjencë, në lidhje me dyshimet për kryerjen e veprës penale të spiunazhit. Operacioni është ende në zhvillim dhe për shkak të ndjeshmërisë së hetimeve, më shumë detaje do të bëhen publike pas përfundimit të operacionit”, njoftoi Prokuroria.
