Dialogu Kosovë-Serbi mes kryenegociatorëve do të mbahet në muajin dhjetor.
Kështu ka bërë të ditur përmes një postimi në Facebook, i dërguari i Bashkimit Evropian për dialogun, Mirolsav Lajçak.
Ai ka shtuar se në këto dy javë të fundit është angazhuar në diskutime të rëndësishme mbi dialogun dhe rrugën përpara.
“Dy javët e fundit kanë qenë sa produktive me vizita në Gjenevë, Tiranë dhe Paris. Me bashkëbiseduesit e mi në Komitetin Ndërkombëtar të Kryqit të Kuq, Quai d’Orsay dhe gjetkë, u angazhova në diskutime të rëndësishme mbi Dialogun dhe rrugën përpara. Këto biseda janë kritike në formësimin e punës që po bën ekipi im ndërsa përgatitemi për takimin e ardhshëm të kryenegociatorëve në dhjetor. Pres me padurim periudhën e ardhshme”, ka shkruar Lajçak.
Kryenegociatorët Besnik Bislimi dhe Petar Petkoviq, më 24 tetor zhvilluan takimin e radhës në procesin e dialogut.
Pas këtij takimi Lajçak kishte bërë të ditur se në fokus ishte avancimi dhe normalizimi i marrëdhënieve ndërmjet Kosovës dhe Serbisë, veçanërisht përmes zbatimit të Marrëveshjes së vitit 2023 për Rrugën e Normalizimit.
Ndërkaq kujtojmë se udhëheqësit politikë të negociatave, kryeministri Albin Kurti dhe presidenti Aleksandar Vuçiq, nuk janë takuar qysh më 14 shtator të vitit 2023.
Kosova dhe Serbia zhvillojnë dialog në Bruksel që nga viti 2011. Procesi, i cili mbështetet nga Shtetet e Bashkuara, synon normalizimin e raporteve mes vendeve.
Palët kanë arritur dhjetëra marrëveshje, por shumica nga to nuk janë zbatuar. /Telegrafi/
