Muzeu i Mitrovicës mirëpriti mbrëmë dhjetëra vizitorë në hapjen e ekspozitës etnologjike “Një Jetë në Gajtan.” Kjo ngjarje unike, e realizuar në bashkëpunim me Fondacioni Dhemetra dhe me mbështetjen e Ministrisë së Kulturës, Rinisë dhe Sportit, ndriçoi trashëgiminë kulturore materiale të rajonit të Mitrovicës përmes mjeshtërisë së punës së dorës në tekstil.
Koha e parashikuar e leximit: 1 minut
Ekspozita paraqet një koleksion të pasur veshjesh tradicionale të shekujve XIX-XX, përfshirë jelekë, mintanë, xhamadan dhe dollame të punuara me gajtan, të mbledhura ndër vite në fondin e muzeut. Përmes këtyre objekteve, vizitorët patën mundësinë të përjetojnë dhe reflektojnë mbi rolet shoqërore, kulturore dhe ekonomike që ky koleksion pasqyron.
Fjalën e hapjes e mbajtën Fitore Bala Bucaliu, drejtore e Fondacionit “Dhemetra,” dizajnerja Era Buza dhe kuratorja Nora Prekazi Hoti, të cilat theksuan rëndësinë e ruajtjes dhe promovimit të trashëgimisë kulturore.
Ekspozita është e hapur për publikun dhe ftojmë të gjithë të vizitojnë këtë rrugëtim përmes fijeve të gajtanit që rrëfejnë historinë dhe kulturën e pasur të rajonit tonë.
