Koha e parashikuar e leximit: 2 minuta
Administrata e Donald Trump ka akuzuar Universitetin e Harvardit për shkelje të të drejtave civile të studentëve hebrenj dhe ka paralajmëruar ndërprerjen e financimeve federale ndaj këtij institucioni prestigjioz.
Akuzat vijnë pas një hetimi të zhvilluar nga një task forcë federale lidhur me protestat në kampus që lidhen me luftën në Gaza. Sipas gjetjeve të kësaj task force, Harvardi ka qenë “qëllimisht indiferent” ose madje “pjesëmarrës me vetëdije” në ngjarje të karakterizuara si ngacmime antisemite ndaj studentëve hebrenj gjatë demonstratave kundër luftës.
Në reagimin e tij zyrtar, Universiteti i Harvardit i ka mohuar me vendosmëri këto akuza, duke theksuar se ka ndërmarrë “masa konkrete dhe të qëndrueshme” për të luftuar antisemitizmin në ambientet universitare.
Përplasja mes administratës Trump dhe Harvardit përfaqëson një përshkallëzim të mëtejshëm të tensioneve. Sipas raportimeve, administrata po shqyrton gjithashtu mundësinë e largimit të Harvardit nga regjistri federal i institucioneve që pranojnë studentë ndërkombëtarë, si dhe po kërkon që ambasadat amerikane të refuzojnë dhënien e vizave për studentët e rinj të këtij universiteti.
