Koha e parashikuar e leximit: 6 minuta
20 qershor 2025
Kancelari gjerman Friedrich Merz tha se “Izraeli është duke bërë punën e pistë”, për të gjithë ne në Iran. Kjo deklaratë ka shkaktuar reagime të shumta në Berlin.
Kancelari gjerman Friedrich Merz ka shkaktuar debate të shumta me deklaratën e tij se “Izraeli po bën punët e pista për të gjithë ne në Iran”. “Ky togfjalësh, ka shkaktuar acarim në grupin parlamentar të SPD-së”, thotë eksperti i politikës së jashtme Adis Ahmetoviq për portalin “ZDFheute.de”.
Kundërshtime të forta erdhën edhe nga të Gjelbrit, Partia e Majtë dhe aleanca e Sahra Wagenknecht. Ndërsa kancelari i sheh pikëpamjet e tij si të justifikuara nga reagimet.
“Kjo deklaratëmori miratim në masë të madhe”, tha Merz nëBerlin. Kishte vetëm disa zëra kritikë që ai nuk pranoi t’i komentonte. Kritikët e Merz i referohen një fraze në një intervistë për ZDF në margjinat e samitit të G7 në Kanada.
Deklarata e kancelarit Merz për Iranin dhe Izraelin shkakton valë reagimesh në politikën gjermane
Një deklaratë e bërë nga kancelari gjerman Friedrich Merz në një intervistë televizive ka ndezur debat të ashpër në skenën politike gjermane. Gjatë një interviste për ARD-në me moderatoren Diana Zimmermann, e cila përmendi termin “punë e pistë”, Merz e mori këtë frazë dhe e përdori për të përshkruar veprimet e Izraelit në Iran: “Zonja Zimmermann, jam mirënjohës që përdorët termin ‘punë e pistë’. Kjo është puna e pistë që Izraeli bën për të gjithë ne. Ne jemi gjithashtu të prekur nga ky regjim. Ky regjim mullahësh ka sjellë vdekje dhe shkatërrim në botë”, deklaroi ai, duke shprehur gjithashtu “respektin më të madh” për ushtrinë dhe qeverinë izraelite që, sipas tij, treguan guxim.
Kjo deklaratë u prit me kritika të forta, sidomos nga radhët e koalicionit qeverisës dhe opozitës.
Zëdhënësi për politikën e jashtme të SPD-së, Adis Ahmetoviç, u distancua qartë nga qëndrimi i kancelarit: “Qëllimi kryesor në këtë situatë të ndjeshme është deeskalimi. Toni i kancelarit nuk ndihmon në këtë drejtim”, tha ai.
Kolegu i tij nga SPD, Ralf Stegner, e cilësoi deklaratën si “më shumë se e çuditshme” dhe theksoi se një gjuhë e tillë nuk i shërben diplomacisë.
Nga Partia e Gjelbër pati kritika edhe më të ashpra. Luise Amtsberg, raportuese për Lindjen e Mesme dhe Iranin, e quajti deklaratën “cynike dhe injorante”, duke kërkuar nga qeveria federale të fokusohet në uljen e tensioneve dhe jo në retorikë të rrezikshme.
Ndërkohë, politikani i gjelbër Anton Hofreiter u shpreh për Welt TV se zgjedhja e fjalëve nga Merz ishte “e ngathët”, duke nënvizuar se shumica e popullsisë iraniane është kundër regjimit, por se nga sulmet izraelite janë prekur edhe civilë të pafajshëm.
Kritikat më të ashpra erdhën nga e Majta. Kryetari i grupit parlamentar të kësaj partie, Sören Pellmann, e quajti deklaratën “një skandal”: “Kancelari po hedh poshtë parimet e së drejtës ndërkombëtare dhe po përqafon logjikën e rrezikshme të ‘të drejtës së më të fortit’. Kjo dëmton rëndë imazhin e Gjermanisë në Kombet e Bashkuara dhe më gjerë”, deklaroi ai.
Reagimet tregojnë përçarjen e thellë në politikën gjermane lidhur me mënyrën se si duhet trajtuar situata në Iran dhe roli që duhet të luajë Gjermania në këtë krizë ndërkombëtare.
Deklaratat e kancelarit Friedrich Merz lidhur me sulmet e Izraelit në Iran kanë shkaktuar reagime të shumta dhe të ashpra në spektrin politik gjerman. Kreu i grupit parlamentar të Partisë së Majtë, Sören Pellmann, i cilësoi këto deklarata si një refuzim të qartë të sundimit të ligjit dhe normave ndërkombëtare. “Shumica prej nesh ndoshta ende nuk e dinë se ku mund të përfundojë kjo”, deklaroi Pellmann për agjencinë dpa, duke paralajmëruar për pasojat e mundshme afatgjata.
AfD: “Mungesë respekti dhe dëmtim”
Edhe partia populiste AfD dënoi ashpër deklaratën e Merzit. Sipas bashkëkryetarëve Alice Weidel dhe Tino Chrupalla, ajo përfaqëson “mungesë respekti dhe dëmton rëndë reputacionin e Gjermanisë”. Ata theksuan se një përfshirje aktive në një konflikt të armatosur në Lindjen e Mesme nuk është në interesin e Gjermanisë dhe as të Evropës. “Politikanët evropianë duhet të mbrojnë qytetarët e tyre nga pasojat negative të konfliktit, si migracioni apo sulmet, dhe të kontribuojnë me diplomaci për paqen”, thuhet në reagimin e AfD-së.
BSW: “Standarde të dyfishta”
Nga ana e saj, kryetarja e Bashkimit për Drejtësi dhe Liri (BSW), Sahra Wagenknecht, e cilësoi deklaratën e Merzit si “të paprecedentë”. Ajo akuzoi kancelarin se “po legjitimon në mënyrë të paturpshme një luftë agresioni që bie ndesh me të drejtën ndërkombëtare dhe që ka marrë tashmë jetën e qindra civilëve në Iran”. Sipas Wagenknecht, kjo përbën një largim serioz nga tradita e politikës së jashtme të moderuar që ka ndjekur Gjermania ndër vite. Ajo e akuzoi Merz për përdorim të standardeve të dyfishta dhe për rrezikimin e qëndrueshmërisë ndërkombëtare në një moment të tensionuar global.
Deklaratat e Merz shkaktuan mosbesim edhe në komunitetin gjermano-iranian.
“Z. Merz, Ju nuk jeni prekur fare nga ky regjim. Para së gjithash, ata që preken janë 80 milionë njerëzit në Iran që kanë jetuar nën shtypjen vdekjeprurëse të këtij regjimi për 46 vjet”, shkroi gazetarja Gilda Sahebi në Instagram. Ajo shtoi se qeveria izraelite nuk po bënte “punën e pistë”; kjo ishte puna e shumë njerëzve që po i rezistonin atyre në pushtet. “Këta njerëz tani po bombardohen.”
