Koha e parashikuar e leximit: 1 minut
10 prill 2025
Kryeministri në detyrë, Albin Kurti, është regjistruar si deputet në Kuvendin e Kosovës të enjten, pas fitimit të mandatit në zgjedhjet e 9 shkurtit.
Megjithatë, ai nuk ka dhënë përgjigje kur është pyetur nga gazetarët për formimin e qeverisë së re.
“Kam takim në orën 11:00”, ka thënë Kurti, duke u larguar nga gazetarët që kërkonin një koment.
Në vizitën e tij të mërkurën në Koshare, Kurti gjithashtu u pyet për refuzimin e takimit me liderin e LDK-së, Lumir Abdixhiku, por edhe atëherë nuk dha asnjë përgjigje.
Kryeministri në detyrë kishte ftuar Abdixhikun për një takim konsultues, duke ofruar tri orare të ndryshme.
Megjithatë, kreu i LDK-së refuzoi takimin, duke theksuar se gjuha e përdorur nga LVV-ja ndaj LDK-së ka pamundësuar çdo mundësi për bashkëpunim për formimin e Qeverisë së re./dukagjini
