Ministrja e Jashtme gjermane, Annalena Baerbock arriti në Kiev të hënën duke u zotuar për mbështetjen e vazhdueshme të Berlinit për Ukrainën, mes shqetësimeve për të ardhmen e mbështetjes së Washingtonit teksa zgjedhjet në SHBA afrohen.
Baerbock tha se Ukraina, duke u përballur me dimrin e tretë të luftës, ka nevojë për mbështetje për të siguruar mbijetesën e saj, pasi përfshirja ushtarake e Koresë së Veriut dhe sulmet ajrore ruse në infrastrukturën civile e përkeqësojnë konfliktin.
Vizita e saj vjen në prag të zgjedhjeve presidenciale në SHBA, në të cilat një fitore për kandidatin republikan Donald Trump mund të hedhë dyshime mbi mbështetjen e ardhshme nga mbështetësi kryesor ushtarak i Ukrainës.
“Ne po e kundërshtojmë këtë brutalitet me humanizmin dhe mbështetjen tonë, në mënyrë që ukrainasit jo vetëm të mbijetojnë dimrin, por që vendi i tyre të mund të mbijetojë. Sepse ata po mbrojnë gjithashtu lirinë e të gjithë neve në Evropë”, tha Baerbock, duke nisur vizitën e saj të tetë në Ukrainë, raporton Reuters, transmeton Klankosova.tv.
Gjermania është shfaqur si donatori kryesor i Ukrainës për ndihmën ushtarake në Evropë dhe ka koordinuar ngushtë mbështetjen e saj me Uashingtonin.
Megjithatë, nëse Donald Trump mund demokraten Kamala Harris në zgjedhjet e së martës, ky koordinim i ngushtë mund të lëkundet. Trumpi ka kritikuar nivelin e mbështetjes së SHBA-së për Kievin dhe ka refuzuar të thotë se dëshiron që Ukraina të fitojë luftën, të cilën ai thotë se do ta përfundojë shpejt duke nxitur për një zgjidhje të negociuar.
