18 korrik 2025
Dy bilionë euro për shtatë vjet: Komisioni Evropian ka plane të mëdha me një buxhet edhe më të madh. Por qeveria gjermane nuk është dakord, as ekonomia e shoqatat mjedisore.
Koha e parashikuar e leximit: 5 minuta
Berlini zyrtar nuk e pranon buxhetin e BE e priten negociata të vështira në këshillimet midis shteteve anëtare dhe Parlamentit Evropian në të ardhmen. Qeveria gjermane i ka kritikuar propozimet kryesore të Komisionit Evropian për planet e ardhshme të buxhetit. Qeveria gjermane nuk e ka të mundur ta pranojë propozimin e Komisionit, sipas zëdhënësit të qeverisë Stefan Kornelius.
“Një rritje e përgjithshme në buxhetin e BE është e panegociueshme në një kohë kur të gjitha shtetet anëtare po bëjnë përpjekje të konsiderueshme për të konsoliduar buxhetet e tyre kombëtare,” tha Kornelius.
Gjermania kontribuon me pothuajse një të katërtën
Në të ashtuquajturin Kornizë Financiare Shumëvjeçare (KFSH), Komisioni Evropian propozon një buxhet prej dy bilionë eurosh për periudhën 2028-2034. Kjo është e barabartë me rreth 700 miliardë euro më shumë sesa për periudhën aktuale buxhetore shtatëvjeçare. Ndër të tjera, janë planifikuar më shumë para për mbrojtjen dhe konkurrueshmërinë. Si shteti anëtar me peshën më të madhe ekonomike, Gjermania në përgjithësi kontribuon me pothuajse një të katërtën e fondeve.
KFSH është krijuar për një periudhë shtatëvjeçare dhe fillimisht propozohet nga Komisioni Evropian përpara se të debatohet nga shtetet anëtare të BE dhe Parlamenti Evropian. Buxheti afatgjatë përcakton kufijtë maksimalë për shpenzimet vjetore të BE dhe mënyrën se si përdoren ato.
Kritika ndaj taksimit shtesë të korporatave
Si një nga burimet e reja të të ardhurave për buxhetin e BE, Komisioni propozon një taksë mbi kompanitë e mëdha me një qarkullim vjetor prej më shumë se 100 milionë eurosh. Edhe kjo taksë shtesë mbi kompanitë e mëdha, e cila synon të lehtësojë buxhetet e shteteve anëtare, nuk e ka mbështetjen e qeverisë federale gjermane.
Ministri gjerman i Financave, Lars Klingbeil deklaroi në kuadër të një takimi të ministrave të Financave të G-20-ës në Afrikën e Jugut se qeveria gjermane dëshiron të forcojë ekonominë gjermane, të garantojë punësimin dhe të tërheqë investime në vend. “Dhe në këtë kontekst, taksa e korporatave e propozuar tani nga Komisioni Evropian, në formën aktuale, dërgon sinjal të gabuar.”
Kritika ndaj projektbuxhetit të Komisionit Evropian: Biznesi dhe ambientalistët të pakënaqur
Politikani i SPD-së, Nils Schmid Klingbeil, ka kritikuar nivelin e planifikuar të shpenzimeve në projektbuxhetin e Komisionit Evropian, duke kërkuar një balancë më të mirë në aspektin financiar. “Duhet të ruajmë një proporcion absolut në financa. Nuk mendoj se kjo po ndodh”, deklaroi ai.
Megjithatë, qeveria gjermane ka shprehur mbështetje për qasjen reformuese të Komisionit, sidomos për orientimin e ri të buxhetit drejt fushave si konkurrueshmëria dhe mbrojtja. Brukseli ka njoftuar se synon të reduktojë numrin e programeve të ndihmës për të mundësuar një shpërndarje më të fleksibël të fondeve.
Bizneset paralajmërojnë për pasojat ekonomike
Shoqatat e biznesit në Gjermani kanë shprehur shqetësime për mundësinë e vendosjes së taksave të reja. Shoqata e industrisë automobilistike (VDA) ka theksuar se kompanitë ndodhen në një situatë të vështirë ekonomike dhe çdo rritje e tatimeve do të ishte e papranueshme. Presidentja e VDA-së, Hildegard Müller, e ka konsideruar veçanërisht të dëmshme një taksë speciale mbi fitimet, duke paralajmëruar se kjo do të dëmtonte konkurrueshmërinë e kompanive evropiane.
Edhe Dhoma Gjermane e Industrisë dhe Tregtisë (DIHK) është shprehur kundër këtyre masave fiskale. Drejtoresha e Përgjithshme, Helena Melnikov, theksoi se kompanitë kanë nevojë për mbështetje dhe jo për barrë shtesë tatimore.
Grupet mjedisore ndihen të anashkaluara
Organizatat për mbrojtjen e mjedisit kanë shprehur zhgënjim për mungesën e mbështetjes për natyrën në projektbuxhetin e Komisionit. Federata Gjermane për Mjedisin dhe Mbrojtjen e Natyrës (BUND) e ka cilësuar buxhetin si “një zero për mbrojtjen e natyrës”, duke theksuar mungesën e angazhimeve konkrete financiare për zbatimin e Aktit për Rivendosjen e Natyrës.
Edhe WWF ka kritikuar shkurtimet e planifikuara për fondet e mbrojtjes së mjedisit, duke e cilësuar këtë si një vendim të papërgjegjshëm përballë krizave klimatike në rritje, veçanërisht në një verë të shënuar nga valë të nxehti, zjarre dhe përmbytje.
Projektbuxheti i propozuar pritet të vijojë të shkaktojë debat të gjerë në rrethet politike, ekonomike dhe mjedisore në javët në vijim.
